Inan-Aman ESG 10 Dezembru Loke Sala Ida Ba Eskola Ne’e

Ministra Edukasaun, Jo-ventude no Desportu (MEJD), Dulce de Jesus Soares hateten inan-aman estudantes husi Eskola Sekundario Jeral 10 Dezembru fo kontribuisaun liu husi Asosiasaun dos Pais harii sala foun ida ba iha eskola ne’e.

Tuir nia, ida ne’e ezemplu diak ida ne’ebe eskola ne’e hatudu hodi eskola sira seluk iha teritoriu tomak hodi bele halo tuir.
“Sira iha inisiativa rasik ho suporta husi inan-aman estudantes harii tan salaun professor ida, kontribui ba prosesu aprendizajen iha eskola refere,” nia hateten, iha Comoro, Dili.
“Publiku barak dehan, eskola ne’e estudante sira laiha disiplina maibe ohin ita haree katak inan-aman sira fo ona kontribuisaun bo’ot tebes, ita hein katak ba oin estudante sira ne’e bele fo prestasaun diak atu nune’e aban bainrua bele sai sidadaun Timor-Leste ida ne’ebe responsalve.”
Entretantu Xefe Suku Fatudaha, Marcelino Soares aparesia ho professores Eskola Sekundario Geral 10 de Dezembro ne’ebe hatudu ona espirito nasionalismo hodi serviso hamutuk ho inan -aman estudantes hodi konstrui salaun ida.
“Liu husi professores sira nia dedikasaun no sakrifisio mak bele lori nasaun la’o ba oin ho diak,” nia hateten.
Nia dehan, iha tinan kotuk mos eskola 10 de Dezembro harii ona salaun ba diretor da eskola ne’ebe hetan inagurasaun husi autoridade suku Fatuhada rasik.
Enkuantu total estudante husi eskola refere hamutuk 1779, portantu total orsamentu ba konstrusaun sala foun ne’e hamutuk $15 mil, orsamentu ne’e mai husi inan-aman.