MEJD-CNC Asina Ona MoU Livru Istoriku Tama Ba Kurrikulum Eskolar

Governu liu-hosi Ministeriu Edukasaun, Joventude no Desportu (MEJD) hamutuk ho Centru Nasional Chega (CNC) assina ona nota entendimentu atu livru historiku Chega bele tama ba iha kurikulum eskolar nian hodi uza hanorin ba estudante sira.

Ministra Dulce de Jesus Soares, hateten ministeriu hamutuk Centru Nasional Chega hakarak lori estudante sira tenke hatene istoria passado nian.
“Bainhira ami dezenvolve kurikulum ba primeiru no segundu siklu, ami ba buka informasaun iha sentru nasional chega nian hodi tau iha kurikulum eskolar nian,” Ministra Soares hateten, iha Dili.
Nia hateten, asina nota entedimentu ne’e importante atu garante katak informasaun hirak ne’e tenke tama iha kurikulum eskolar, portantu tinan 2019 sei halo revizaun ba terseiru siklu, setimu, nono ano inklui ba ensino sekundariu nian.
“Ami sei servisu besik ho sentru nasional Chega tanba iha ne’eba iha peritu sira ne’ebe kompriende liu oinsa maka bele hatama materia sira ne’e iha kurikulum tuir nivel ensinu,” nia hateten.
Enkuantu, nia dehan sei iha historia vivo barak maka estudante sira presiza no hakarak aprende hodi sira bele kompiende liu tan.
Entretantu Prezidente Sentru Nasional Chega (CNC), Ines Almeida hateten Sentru Nasional Chega iha ona planu atu tau peritu ida iha tinan oin mai.
“Ami sei ko’alia ho Ministeriu Edukasaun, Joventude no Desportu atu haree oinsa mak tau peritus ne’e para depois haree kona-ba servisu ne’e ba futuru,” nia hateten.