SJT-TL Oferese Formasaun Kona ba Lei Laboral Ba Trabalhadores 20

Sekretariu Jeral Sindikatu Jeral Trabalhador Timor-Leste (SJT-TL), Almerio Vila Nova hateten SJT oferese formasaun ba trabalhador hamutuk na’in ruanulu (20) hodi aprende kona ba direitu no dever atu reduz konflitus laboral iha relasaun trabalhu nian.

Nia hateten, SJT-TL konvida membru traballador sira kompostu husi setor komersiu industria, otelaria nomos servisu publiku atu aprende kona-ba direitu no dever tuir lei numeru 4/2012.
“Importante liu ba sindikatu atu hato’o direitu no dever trabalhador sira hodi bele reduz numeru konflitus laboral, tanba ita hatene katak durante ne’e mosu konflitus laboral barak husi trabalhador no empregador tanba parte rua ne’e ladun koñese didi’ak kona-ba sira nia direitu no dever,” nia hateten, iha Dili.
Nia dehan, trabalhador sira nia dever ne’e konsidera hanesan empregador ninia direitu, no empregador nia direitu konsidera hanesan trabalhador ninia dever.
Nia dehan, parte rua ne’e tenke iha responsabilidade atu implementa direitu no dever tuir regras lei nian, konflitus laboral sei akontese tanba seidauk implementa lei laboral ne’e ho lolos.
“Liu hosi formasaun ida ne’e, ami hato’o ba sira kona ba saida de’it mak regula sira-nia direitu tuir lei numeru 4/2012 iha konstituisaun RDTL artigu 50-52 no mos tuir konvensaun internasional ne’ebé mak ita nia governu ratifika ona,” nia dehan.
Entretantu Diretor Nasional Relasaun Trabalhu (DNRT), Angelo dos Santos Veloso hateten SEFOPE halo parseiru hamutuk ho SJT-TL atu sensibiliza kona-ba lala’ok lei trabalhu nian hodi trabalhador sira ne’e hatene sira-nia direitu no dever.
“Maibe ami sujere ba sindikatu jeral trabalhu iha Timor-Leste atu haree, tanba la’os atu defende de’it trabalhador sira nia direitu maibe oinsa maka sir abele hatene sira nia dever no direitu ho didiak,” nia hateten.
Nia dehan, SEFOPE iha diresaun inspektor trabalhu ne’ebe prontu halo inspeksaun ba empregador no trabalhador sira ne’ebé mak viola lei trabalhu nian.
“Durante tinan lima oin mai ne’e, karik empregador balun viola trabalhador sira nia direitu, entaun empregaor fo multa ba estadu Timor-Leste,” nia dehan.