Professores 300 Hatama Ona Dokumentos Reforma Nian

Diretor Jeral iha Ministeriu Edukasaun, Joventude no Desportu (MEJD), Antoninho Pires hateten iha ona profesores nain 300 (idade reforma) maka hatama dokumentus reforma nian ba iha ministeriu hodi bele prosesa sira nia reformasaun.

Nia hateten, total profesores ne’ebe tama ona iha idade reforma hamutuk nain 800 tuir dadus iha tinan kotuk nian.
“Husi numeru ne’e, foin iha nain 300 maka hatama ona dokumentus reforma nian ba iha Ministeriu Edukasaun atu prosesa,” nia hateten, iha Dili.
Nia dehan, sira nain 300 ne’ebe hatama dokumentos ne’e, balun sira nia kondisaun fizika ladun diak no sira ne’e la hala’o ona serviso ka hanorin hanesan bain bain.
“Balun ne’ebe mak kondisaun fisika diak, ministerio nafatin kaer metin hodi fo kontribuisaun ba hanorin tinan ida ka rua tan,” nia dehan.
Iha parte seluk membru Komisaun Funsaun Publiku (KFP), Komisario Disiplinar Antonio Freitas husu ba professores ne’ebe mak tama ona idade reforma tenke halo rekerimento ba Ministeiro Edukasaun no mos ba KFP, nune’e bele prosesa sira nia reformasaun.
“Profesores ne’ebe mak kondisaun sei normal no sei bele hanorin, ministerio tenke halo fali rekerimento mai komisaun, nune’e bele rekonese katak professores reforma ida ne’e sei halo serviso hanesan bain bain,” nia dehan.
Iha sorin seluk Sekretario Nasional Rede Edukasaun Timor-Leste Coalition for Education (TLCE), Jose Monteiro hateten professor ne’ebe mak tama ona ba reforma tenke hatama dokumentos reforma nian.
“Maibe Ministerio Edukasaun tenke halo uluk rekrutamento ba professor foun sira, nune’e bele troka fali sira ne’ebe mak hetan ona reforma ne’e,” nia sujere.
Nia dehan, kuando tama ona reforma mak sira serviso nafatin, tenke selu sira nia salario ne’e diferensa ho professores seluk tanba sira idade reforma ona maibe nafatin kontribui ba edukasaun.