Eskola Tekniku Vokasional Soibada Menus Professor

Diretor da Eskola Tekniku Vokasional Soibada, Joanico da Costa hateten dadaun ne’e sira nia eskola sei menus profesor, liu-liu ba materia Matematika nian.

“Tinan ida nia laran, estudante sira la simu materia Matematika tanba professor laiha,” nia hateten.
Nia dehan, uluk iha tinan 2017 ne’e iha duni professor ida mak hanorin materia matematika maibe iha tinan 2018 to’o agora ne’e estudante sira la simu materia matematika tanba professor la iha.
“Problema ne’e ami hato’o ona ba Edukasaun Munisipio Manatuto atu rezolve maibe to’o agora seidauk iha resposta,” nia dehan.
Tanba ne’e, husu ba Ministerio Edukasaunatu rezolve problema ne’e tanba durante tinan ida nia laran, estudante sira la simu materia ida ne’e no ida ne’e fo impaktu ba estudante sira.
“To’o ezame nasional, estudante sira prienxe arbiru deit ba materia matematika,” nia dehan.
Iha sorin seluk Diretor Jeral iha Ministerio Edukasaun Joventude no Desporto (MEJD), Antoninho Pires rekonese, katak problema menus professor ne’e kada tinan sempre akontese maibe prosesu aprendizajen kontinua la’o.
“Professor sira no diretor da eskola bele prienxe aula mesmu ke laiha background iha materia matematika, sira bele prienxe hela,” nia sujere.
Tuir regulamento, nia dehan professor ida tenke hanorin minimu semana ida 24 oras iha sala laran.
“Professor ne’ebe mak seidauk komplento 24 oras, nia bele ba hanorin tan materia seluk ne’ebe baziku hodi bele kompleta nia oras 24 ne’e,” nia dehan.
Iha sorin seluk Sekretario Nasional rede edukasaun Timor-Leste Coalition for Education (TLCE), Jose Monteiro hateten eskola barak mak to’o agora pofessor la to’o, tanba distribuisaun profesor ne’ebe mak la hanesan no la bazeia ba realidade eskola nian.
“Ita haree, eskola balun alunus oituan e professor barak liu, eskola balun alunus barak maibe professores oituan deit,” nia dehan.
Nia hateten, ida ne’e INFORDEPE aponta hela hodi halo formasuan maibe sira seidauk iha plano atu halo rekrutamento ba professor sira.
“Ita hein katak, sira bele foti fali professor sira iha eskola ne’ebe mak barak liu, nune’e bele pasa fali ba eskola sira seluk ne’ebe sei menus professors,” nia esperansa.
Nia dehan, diretor da eskola ne’ebe lolos halo jestaun ba eskola maibe tanba professor la to’o entaun nia tenke hanorin mos e ikus mai nia hatama professor voluntariu hodi hanorin.
“Bainhira la selu sira, tenke fo sala ba Ministerio Edukasaun,” nia dehan.
Tanba ne’e, nia sujere Ministeriu Edukasaun tenke iha dadus ne’ebe adekuadu kona ba total estudantes iha kada eskola, nune’e bele distribui professor sira ho lolos hodi rezolve problema menus professor iha futuru.