- Publika iha: 25 Abril 2019
Diretor Jeral iha Ministeriu Edukasaun, Joventude no Desportu (MEJD), Antoninho Pires hateten ministeriu identifika ona eskola 50 iha rai laran hodi halo rekualifikasaun infra-estruturas tanba ba eskola hirak ne’e kondisaun la permite ona hodi hala’o prosesu aprendizajen.
Nia hateten, eskola 50 ne’ebe identifika ne’e hahu husi ensino baziku to’o ensino sekundariu iha teritoriu tomak.
“Balun parede eskola nian nakfera, uma riin komesa aat, ai mos komesa dodok no monu hotu no ida ne’e perigu tebes tanba bainhira udan -anin bo’ot, bele monu,” nia hateten, iha Dili.
Nia dehan, eskola sira ne’e tau hotu ona iha planu, hein deit atu halo rekualifikasaun iha tinan ida ne’e (2019).
“Ami garantia katak ho orsamento ne’ebe mak ami iha, ami sei halo rekualifikasaun ba eskolas 50 ne’ebe ami identifika ona iha tinan ida ne’e,” nia hateten.
Iha parte seluk Sekretario Nasional rede edukasaun Timor-Leste Coalition for Education (TLCE), Jose Monteiro hateten ne’e planu ne’ebe diak maibe tenke iha dadus ne’ebe lolos kona ba eskola hira maka kondisaun aat ona.
“Ami akompanha, durante ne’e ministerio seidauk iha dadus ne’ebe adekuadu hodi hatene eskola ida ne’ebe mak seidauk hadia, aula hira mak atu aumenta, tenke iha dadus lolos, estudante nain hira mak atu uza, tenke hatene hotu buat hirak ne’e,”nia dehan.