Presiza Harii Dormitoriu Iha Sentru Formasaun Beaco

Diretor Sentru Nasional Formasaun Profesional Becora, Lorenco da Silva Gusmao husu atu harii uma dormitoriu ida iha sentru formasaun Beaco, munisipiu Viqueque nian hodi formandu no formador sira bele hela ba.

Nia dehan, tanba sentru formasaun ne’e do’ok husi capital munisipiu no postu e sentru ne’e loke ba Viqueque oan sira hodi prepara ba projetu mina iha Beaco nian.
“Ami husu ba governu liu-liu ministeriu ne’ebe tutela ba, presiza harii uma dormitoriu ida iha ne’eba tanba durante ne’e formandu ho formador sira buka fatin tun-sa’e atu hela ba,” nia sujere.
Nia dehan, sentru formasaun ne’e harii husi governu liu husi Sekretariadu Estadu Formasaun Profesional no Empregu (SEFOPE) ho fundus husi Banku Dezenvolvementu Asia (ADB) liu husi SEFOPE.
“Sentru ne’e loke ho objetivu atu fo formasaun ba Viqueque oan sira, prepara sira ba projetu dada kadoras mai iha tasi mane Beaco nian ne’ebe governu planea ona,” nia dehan.
Iha sentru formasaun ne’e, nia dehan joventude sira aprende kona ba karpinteiru, pedreiru, eletrisidade, soldadura inklui mos kanalizasaun nian.
“Formandu hamutuk 25 maka remata ona sira nia formasaun iha sentru ne’e e hein simu deit sira nia sertifikadu,” nia dehan.
Entretantu Sekretariu Estadu para Formasaun Profesional e Emprego Julião da Silva, hateten governu fo prioridade ba sentru formasaun sira ne’ebe eziste iha rai laran hodi fo formasaun ba foinsa’e sira, prepara sira ba servisu (rai laran no liur).
“Oitavu governu konstitusional nia politika hato’o ona, katak atu emprega Timor oan 60.000 hetan oportunidade servisu, tantu iha rai liur nomos iha rai laran,” nia dehan.
Kona ba harii uma dormitoriu, nia hateten, iha fulan ne’e SEFOPE sei halo visita ba sentru formasaun hotu iha rai laran, haree espasu oinsa maka bele harii uma ida iha sira nia fatin.
“Formandu ho formador sira presiza fatin ne’ebe dignu hodi hela no bele tuir formasaun ho diak mos,” nia dehan.
Alende ne’e, nia mos husu foinsa’e sira hotu atu hakbesik aan ba iha sentru formasaun ne’ebe besik hodi eleva konesementu, kapasidade ho skill ne’ebe diak, nune’e bele kompete iha merkadu do trabalhu.