- Publika iha: 04 Junho 2023
Sekretaria Estadu Ambiente (SEA) apoiu implementa programa eskola verde iha munisípiu lima (5), Baucau, Covalina, Díli, Liquiçá no Manatuto, ho objetivu atu proteje ambiente ne’ebé moos no halo jestaun ba lixu iha eskola sira.
Diretora Sentru Edukasaun no Informasaun Ambientál iha SEA, Amenica Machado Fernandes dehan implementasaun programa eskola verde ne'e orsamentu husi SEA rasik hamutuk $30,000 dolar amérikanu.
"Ita apoiu implementa programa eskola verde ne'e iha munisípiu lima ne’ebé ita identifika ne'e, hodi sai hanesan matadalan nune'e mós bele implementa tan ba eskola sira seluk," nia dehan.
Nia hatete, husi eskola iha munisípiu lima ne'e, eskola ne’ebé sai benefisiáriu hetan montante $5,000 hodi realiza programa eskola verde.
"Programa eskola verde ne'e atu bele hatoman estudante sira kria jardin iha eskola nune'e kuda aifuan ho tipu oin-oin nune’ebé bele fó fresku ba eskola, parte ida mós estudante sira bele iha kakutak fresku hodi aprende," nia hatete.
Aleinde halo eskola fresku nune'e mós bele halo jestaun ba lixu iha aredór eskola nune'e eskola bele livre husi soe lixu arbiru.
Entretantu, Xefe Brigada Amiental Munisípiu Liquisa, Livorio Castro, dehan programa eskola verde ne'e kontribui tebes ba ambiente saudável.
"Programa eskola verde ne'e iha munisípiu Liquica implementa iha eskola Tekniku Vokasional Leorema, no Ensinu Báziku Sentral Loutale," nia dehan.
Nia hatete, eskola rua ne’ebé implementa uluk ne'e hanesan programa pilotu, depois haree rezultadu implementasaun husi eskola rua ne'e mak sei implementa fali ba eskola seluk.
Tanba ne'e nia dehan, programa eskola verde ne'e mós bele hatoman igiene saudável, iha abitual no responsabilidade hodi hamoos eskola nune'e bele aprende ho di’ak.