PM Xanana: Asesu Edukasaun Ba Difisiente no Vulneravel Sai Prioridade Ba Governu Foun

Primeiru Ministru Jose Alexandre Kay Rala Xanana Gusmao dehan, hadia problema asesu edukasaun ba ema ho difisiensia no familia ekonomikamente vulneravel sai prioridade ba IX Governu Konstituisional.

Nia dehan, setor edukasaun importante tebes hodi dezenvolvimentu Timor-Leste iha futuru tanba ne’e tenke hadia probelma asesu ba edukasaun ho kualidade ba Timoroan hotu bele asesu ho diak.

“Problema asesu ba edukasaun sai prioridade durante ita nia mandatu, atu bele fasilita ema hotu iha oportunidade asesu ba edukasaun,” Primeriu Ministru Xanana dehan iha Ai-tarak laran.

Nia dehan, governu nafatin asegura kualidade hanorin, kualidade professores konaba siensia pedagojika, hodi asegura kualidade edukasaun iha Timor ba ema hotu hahu husi difisiente no familia ne’ebe ekonomikamente vulneravel.

“Ita sei halo dezenvolvimentu hodi hadia kualidade edukasaun kompleta ekipamentos sira hahu husi nasional to’o rurais,” nia hatete.

Entretantu, Ministra Edukasaun Juventude no Desportu (MEJD), Dulce dos Santos, dehan ministeriu nafatin esforsu hodi hasa’e asesu edukasaun ho kualidade ba ema hotu tantu ema ho kondisaun normal nune’e mos difisiente no familia vulneravel sira.

“Ita kuntinua eleva kualidade edukasaun liu-liu husi hadia kulidade professor nune’e mos halo distribuisaun ba professores sira ne’ebe mak ezistene ona, halo rekrutamentu professores graduadus husi universidade sira integra hodi hafora kualidade edukasaun,” nia dehan.

Alende ne’e mos sei kompleta infarestrurura ne’ebe mak asesibilidade ba ema ho difisiente sira nune’e mos sei kria politika hodi fasilita familia vulneravelidade nia oan asesu ba edukasaun ho kualidade.

“Ita sei hatur didiak sistema edukasaun ida ne’ebe mak diak, kompostu husi prosesu aprendisagem, rekursus umanus, nune’e fatores hotu ne’ebe mak bele hasa’e kalidade asesu ba edukasaun ba ema hotu,” Ministra Dulce dos Santos dehan.

Enkauntu nia dehan, IX governu mos sei kuntinua programa sira ne’ebe mak governu anterior husik hela liu-liu ba konstrusaun infraestrutura escolar sira iha nasaun laran.