- Publika iha: 02 Setembro 2023
Eskola ensinu sekundária hamutuk 16 iha kapitál Díli partisipa iha kompetisaun Tasa Esperansa ne’ebé realiza ho modalidade futeból.
Fundadór Tasa Esperansa, Nilton Gusmão hatete, objetivu kria eventu refere atu kria amizade entre estudante sira no hasa'e sira-nia kapasidade kona-ba prátika futeból.
"Ita realiza tasa esperansa ne'e atu bele fó espasu ba estudante sira hodi ezerse sira-nia talenta ne’ebé mak sira iha," nia informa.
Nia dezeja ho Tasa Esperansa ne'e bele fó oportunidade ba estudante sira hodi promove sira-nia talentu iha área futeból nian, nune'e mós kria amizade entre eskola sira iha kapital Díli.
Entretantu Vise Prezidente Federasaun Futebol Timor Leste, Tenente Jenerál Domingos Raul Falur Rate Laek, agradese ba Komisaun Organizadora, tanba realiza ona eventu ne’e hodi promove estudante nia talentu.
"Agradese ba Fundadór Tasa Esperansa ne’e, tanba iha ona inisiativa hodi realiza Tasa Esperansa ne’e ba estudante sira hodi kria sira-nia amizade, nune'e mós halibur ema hotu," nia dehan.
Tanba ne'e espera katak, Tasa Esperansa tenke iha duni esperansa ida di’ak iha futuru ba foinsa'e sira.
Iha parte seluk Profesór Desportu husi Ensinu Sekundária Jerál Nicolau Lobato, Atanasio Pinto hatete sira-nia ekipa preparadu atu kompete iha Tasa Esperansa.
"Ami-nia preparasaun hala'o kuaze semana 3 ona, ami prontu ona atu kontra adversáriu husi Ensinu Sekundária Sagrado Coração de Jesus Becora nune'e mos eskola sira seluk," nia dehan.
Enkuantu Eskola Sekundária 16 ne’ebé partisipa iha kompetisaun Taxa Esperansa ne’e mak Nicolau Lobato, Sagrado Coração de Jesus, Cafe Taibesi, Canossa, 12 de Novembro, São Pedro, São José , EEC Becora, 5 de Maiu, São Miguel, São José Operário, 4 de Setembro, Colégio Paulos VI, AN Nur, no Herois da Pátria.