- Publika iha: 11 Julho 2011
Tuir Lei de Bazika ne’ebe kria ona husi Ministeriu Educasaun kona-ba idade escola obrigatorio hahu husi tinan 6 no remata escola ho tinan 18 gratuito no univerrsal ba ema hotu no labarik hotu atu hetan asesu ba educasaun hahu ensino baziku to’o sekundariu.
“Maibe realidade ita hare katak labarik barak ho idade eskola nian livre hela iha liur ka dalan ninin,ida ne’e tanba inan-aman la fo oportunidade ba oan sira atu asesu ba edukasaun,”hateten Diretora Nasional pre-Eskolar, Avelina da Costa, semana kotuk iha Vila-verde,Dili.
Nia hatutan, labarik barak seidauk asesu ba edukasaun tanba iha fator impedementu barak mak sira hasoru. “ezemplu distansia eskola husi uma do’ok, la hetan seguransa liu-liu labarik feto sira, estrada ladun diak, hakur mota no seluk tan, tanba ne’e mak sira halimar deit iha uma e to’o tinan 8 mak foin tama eskola,”nia fo ezemplu.
Tan ne’e mak Ministerio Educasaun loke escola filial sira iha Distritu atu nune’e bele responde ba labarik sira ne’ebe hela iha area rurais ne’ebe do’ok husi escola ne’ebe iha Vila , atu nune’e bele fo mos oprtunidade ba sira ne’ebe hela iha area remotas .
Tuir nia,agora la temi ona escola primaria maibe ensino baziko iha ciclo tolu ; primeiru ciclo iha primeiru ano , segundo ano , terceiru ano , no quarto ano iha tinan 4 ; segundo ciclo iha tinan 2 ; terceiru ciclo iha tinan tolu ( uluk ne’e pre secundario ) ensino baziko iha tinan 9 tama escola ho tinan 6 iha primeiru ciclo no remata escola ho tinan 15 iha pre secundario , remata iha secundario ho tinan 18 .
Entretantu Alcino Freitas, hateten nia labele asesu ba educasaun tanba inan-aman la fo oportunidade ba nia atu ba escola no mos ekonomia la sufisiente .
“Ekonomia iha uma laran la sufisiente tan ne’e mak hau para deit iha quarto ano , hau nia servisu mak hakail ikan iha tasi no fa’an hodi hetan osan ajuda ba ekonomia iha uma laran,”nia dehan.