- Publika iha: 11 Julho 2011
Ministru Edukasaun (ME) Joao Cancio Freitas, husu ba polisia atu halo kapturasaun ba joventude sira ne’ebe uza droga tanba ne’e krimi.
“Ami nudar Ministerio Educasaun ba liu area preventiva hateten para estudante ka joven sira labele involve iha narkoba tanba narkoba iha konsekuensia ne’ebe ladiak ba sira nia future, e polisia tenke kaptura,”hateten ME Joao Cancio Freitas semana kotuk iha Dili.
Alende ne’e nia mos husu ba komunidade sira atu kopera hamutuk ho polisia, bainhira hetan joven ruma uza droga ka narkoba tenke informa ba polisia, nune’e bele atua kedas.
Relasiona ho kestaun ne’e, oras ne’e dadaun hala’o hela kampania liu-liu iha eskola sira nune’e estudante sira hatene saida mak narkoba.
“Ita presiza halo kampania tanba narkoba ne’e estraga joven sira, estraga sira nia future,”nia dehan.
Iha parte seluk Trinito Sarmento, Diretor Edukasaun Distritu Manufahi hateten, problema narkoba la’os isu ona maibe realidade akontese ona iha Timor-Leste ne’ebe ho esforsu maka’as atu halo prevensaun no sosializasaun mak tenki forte liu.
“La’os deit ba labarik joventude sira maibe inan aman sira tanba buat ida moral ne’e fundamental mai husi familia mak sai ba iha liur ne’ebe husi parte liur ne’e sentidade sira ne’e iha nia responsablidade moral ida fo sosializasaun ne’ebe diak hodi orienta labarik atu evita nia a’an,”Trinito dehan.
Tuir nia, eskola mak fatin atu eduka no orienta labarik sira liu husi aspetu saida deit atu labarik sira sira evita a’an no hases a’an husi narkoba ne’e tamba nia efeita ba labarik sira , no mos lori labarik sira konverte sira husi hahalok sira ne’ebe ladiak ne’e .
Seidauk iha kurikulun espesifiku ida ba ne’e maibe iha Materia estudu Do meio ne’e iha ona maibe so ida ne’e depende fali ba professores sira ne’ebe mak hanorin nia keativo nia bele dezenvolve diak liu tamba buat sira ne’ebe droga , ladiak no bele afeta fali ba sira nia saude ,mental iha estudu do meio kompleto falta deit mak dezenvolve diak liu tan.