- Publika iha: 17 Junho 2016
Governu liu husi Ministeriu Finansas sei halo reforma fiscal hodi implementa Impostu Valor Akresentadu (IVA) hodi hasa’e kresimentu domestika rai laran nian.
Vise Ministru Finansas Helder Lopes, hateten Filosofia reforma fiscal ne’e ho intensaun atu aumenta reseitas domestika hodi hamenus dependensia ba fundu minarai.
“Iha reforma fiscal ne’e ita sei hamosu IVA hodi haruka kompania ou industra sira selu impostu, nune’e bele hasa’e kresimentu domestika,” Vise Ministru Lopes hateten, iha Dili.
Reforma fiscal ne’e, nia dehan, sei halo ba area tolu hanesan politika, lei no regulamentu prosedimentu administrative.
Iha area lei nian, nia hateten, agora tama ona iha faze final hadia lei tributaria no prepara lei IVA hodi sai baze legal atu obriga kompania sira selu impostu.
Alende ne’e, nia dehan, governu mos prepara hela prosedimentu ne’ebe adekuadu kona ba alvandega nian.
“Ita servisu oinsa atu opta sistema ne’ebe mak apropriadu ligadu ho ita nia kondisoens, nune’e wainhira administrasaun tributaria preparadu, bele uza sistema ne’ebe lolos,” nia hateten.
Maibe antes halo reforma fiscal, nia dehan, presiza halo uluk reforma ekonomia, nune’e bele atrai ema estrangeiru loke industria iha Timor no bele fo servisu ba Timor oan sira.
Iha parte seluk tuir Membru Komisaun C (finansas publiku), Deputada Florentina Smith, katak reforma fiscal importante, tanba ne’e hanesan meus ida atu hasa’e kobransa de taxa.
Tanba nia hateten, reseitas husi selu impostu kada tinan tuun bebeik, entaun governu hamosu politika reforma fiscal atu reve fila fali hodi uza sistema IVA.
“Durante ne’e ita haree buat hotu-hotu gratuitu, kompania la selu taxa, entaun implika ba reseitas domestika, ida ne’e mak ita hotu preokupa,” nia kestiona.
Nia espera, ho reforma fiscal ne’e bele aumenta reseitas domestika rai laran, nune’e bele hamenus dependensia ba fundu minarai nian.