- Publika iha: 25 Setembro 2023
Xefe Departamentu Formasaun no Kapasitasaun iha Bombeiros, José Manuel Alves, dehan atu halo salvamentu ba vítima iha tasi no be'e presiza formasaun tékniku mais avansadu ba korpu Bomberios sira atu bele apoiu sira-nia servisu salvamentu.
Nia dehan, formasaun ba korpu bombeiros kona-ba buska no salvamentu ba vítima sira ne’ebé karik hetan asidente iha área tasi no bee laran, ne'e presiza formasaun ne’ebé mak avansadu atu bele kuntribui ba sira-nia profesionalismu.
"Ita presiza formasaun tékniku mais avansadu liuba salvamentu iha tasi no bee bainhira akontese asidente ruma, tanba salvamentu iha tasi no bee diferensa tebes ho rai maran.
Ita atu salva vítima ida iha bee diferente ho rai maran, tanba ne'e pesoal bombeiros ne’ebé tenke iha koñesimentu mínimu atu nia bele susesu iha servisu," Xefe Departamentu Formasaun no Kapasitasaun iha Bombeiros Manuel dehan iha Pantai Kelapa, Díli.
Nia dehan, durante ne'e iha formasaun ba korpu bombeiros maibé báziku liu kona-ba oinsa halo salvamentu iha tasi no bee iha nivel ne’ebé ladok no la grave liu.
"Ho formasaun baziku ne’ebé mak iha maibé ita iha ona esperiensia kona-ba salvamentu vítima ida ne’ebé mak hetan mout iha be'e," nia salienta.
Enkuantu nia dehan, dadaun ne'e korpu bombeiros hamutuk na’in 15 tuir hela formasaun kona-ba sukorru no buska husi formador Trainer Diver Academy na’in iha Pantai Kelapa.
Entretantu, formanda Filomena Lay Freitas dehan, formasaun ne’ebé sira hetan hanesan bukae ida oinsa atu bele salva vítima iha tasi no bee.
"Esperiénsia ne’ebé ha’u hetan iha formasaun ne'e sai hanesan bukae ida mai ha’u bainhira iha akontesimentu ruma ne’ebé relasiona iha tasi no bee. Ha’u mos iha ona koñesimentu hodi salva vítima sira," nia dehan.
Nia dehan, misaun bombeiros ne'e importante tebes ba komunidade bainhira akontese asidente ka dezastre naturais no inundasaun sira, tanba ne'e atu halo salvamentu ne’ebé mak diak presiza investe iha formasaun mais tékniku modernu no avansadu, nune'e mós kompleta fasilidade atu bele fasilita servisu.