- Publika iha: 18 Outubro 2023
Polísia Nasionál Timor-Leste (PNTL) liuhusi eskuadra Nain Feto prende sigaru ilegál hamutuk slop 601 iha merkadu Taibesi, iha kapital Díli.
Komandante Polísia Munisípiu Díli, Superientendente Xefe Orlando Gomes, dehan siragu ilegál ne’e prende husi joven ida ho inisial QN ne’ebé halo tranzasaun ilegál husi fronteira no konsegue tama to’o kapital Díli iha merkadu Taibesi
“Evidénsia sigaru ilegál ne’ebé ita prende, dadaun ne’e ita asegura hela iha komandu Polísia hodi submete ba prosesu,” nia dehan.
Nia dehan, kona-ba suspeitu ne’ebé halo tranzasaun ilegál ba tabaku ne’e polísia kaptura no dadun ne’e iha sela detensaun hodi halo prosesu identifikasaun no investigasaun no kontinua prosesu ba Ministériu Públiku.
“Ita submete ba sela detensaun hodi kumpri 72 oras, molok ita aprezenta ba primeiru interogatóriu iha tribunal hodi foti desizaun tuir lei ne’ebé vigora iha Timor-Leste,” Komandante Polísia Munisípiu Díli Superientendente Xefe Gomes dehan.
Nia dehan, suspeitu halo tranzasaun ilegál ne’e mai husi munisípiu Bobonaro no utiliza karreta faan ba kioske kiik sira iha Taibesi.
“Atividade tranzasaun sigaru Ilegál ne’e suspeitu hatama husi Munisípiu Bobonaro mai Díli la liuhusi Alfandega ho objetivu atu distribui ba kioske kiik sira iha Díli laran ida-ne'e mak ita hetan halo kapturasaun,” nia informa.
Entretantu, Diretór Ezekutivu Fundasaun Mahein (FM), Nelson Belo dehan tranzasaun ilegál ne’ebé konsegue tama to’o Díli ne’e governu tenke halo investigasaun ba servisu autoridade seguransa sira ne’ebé destaka iha postu-fronteira.
“Ita haree atividade tranzasaun ilegál ne’e akontese bei-beik ona, tanba ne’e presiza investiga didi’ak membru sira ne’ebé koloka iha fronteira tanba saida,” nia dehan.
Maibé nia dehan, parte ida mós haree ba ekipamentu hodi deteta atividade tranzasaun ilegál sira governu tenke responde nune’e mós aumenta pesoál iha fronteira.