- Publika iha: 02 Maio 2018
Federasaun Taekwondo Timor –Leste (FTTL) halo hela selesaun liu husi teste ba atleta Taekwondo ne’ebe sei ba partisipa Asian Games iha Jakarta, Indonesia.
Prezidente Federasaun Taekwondo Timor Leste (FTTL), Angelo Neves hateten, teste ne’e justu, ho objetivu atu haree sira nia tekniko ne’ebe kapas no fiziku diak hodi bele ba tuir Asian Games, iha Agostu tinan 2018 ne’e.
“Tuir regras ne’ebe mak internasional aplika, federasaun aplika mos iha Timor, ne’ebe laiha diferensia,” nia hateten, iha Dili.
Tanba ne’e, nia espera katak tinan ne’e atleta Taekwondo ne’ebe ba partisipa iha Asian Games ne’e sei hetan rezultadu diak liu fali tinan kotuk nian iha Malaysia.
Nia dehan, eventu ne’e hetan apoiu orsamentu hosi Sekretariu Estadu Promosaun Alta Kompetisaun (SEPAK) $1.650 hodi halo teste ka selesaun ba atleta Taekwondo ne’ebe sei tuir Asian Games iha Jakarta ne’e.
Nia dehan, FTTL sei delega ninia atleta hamutuk nain neen (6), kompostu hosi feto nain tolu no mane nain tolu.
“Selesaun ne’e la’o ho imparsial, tanba hahu inisiu kedas hau hateten ona katak iha ne’e laiha familiarismo, hau laiha anak emas, maibe buat hotu tenke liu hosi prosesu, se mak diak liu, badinas, disiplina liu, nia iha direito atu ba hatudu ba publiku hodi nasaun nia naran,” nia dehan.
Nia dehan, atleta sira ne’ebe mak liu ona iha selesaun, sira sei hela iha karantina hodi prepara ba tuir evento ne’e iha Jakarta.
Maibe, nia dehan ba sira ne’ebe mak la liu selesaun, sei treino nafatin hodi back up sai esparing partner ba atleta sira ne’ebe mak liu ona iha selesaun ne’e.
Entretanto Atleta Mariana de Jesus Boavida ne’ebe liu selesaun ne’e sente kontente tanba sei ba partisipa Asian Games iha Jakarta.
“Hau kontente e molok mai iha ne’e tuir selesaun, hau treino be-beik no ikus mai hau selesiona,” nia dehan.
Nia dehan, nia ho nia kolega sira seluk ne’ebe selesiona hodi ba tuir eventu ne’e, sei esforsu hodi prepara sira nia aan ho didiak, nune’e sira bele hetan rezultadu ne’ebe pozitivu.
“Ami sei prepara aan diak hodi lori ita nia nasaun ba rai liur, ami sei esforsu aan,” nia hateten.
Portantu, iha atleta Taekwondo nain 11 mak tuir teste maibe iha nain neen mak liu iha selesaun no sei ba partisipa eventu Asian Games iha Jakarta, Indonesia.