- Publika iha: 08 Agosto 2023
Diretóra Ezekutiva Servisu Autonomo Medikamentu no Ekipamentu Saúde (SAMES), Santana Martins hateten lista esensiál medikamentu Timor-Leste tinan 2015, rejista aimoruk 402 items, ne’ebé durante ne’e halo kompras. Maibé lista ne’e la inklui aimoruk espesialista nian, tanba ne’e, dalabarak médiku espesialista sira husu la bele fornese ho lalais.
Nia dehan durante ne’e kuantifikasaun ba aimoruk bazeia ba lista esensiál medikamentu Timor-Leste nian, entaun bainhira Hospital Nacional Guido Valadares (HNGV) husu aimoruk espesialista nian hato’o pedidu ho autorizasaun Ministériu Saúde halo kompras. Maibé kombras ho kuantidade ki’ik, difisil tebes asesu ba merkadu.
“Ami-nia ezijénsia mak ne’e, nonu governu konstitusional konsidera tau prioridade atu iha aprovasaun ba lista esensiál tomak ne’ebé Minsitériu Saúde selesiona atu sai hanesan lista ofisiál ida. Lae komunidade hakilar ba SAMES, ezemplu aimoruk la tama lista kompras mós públiku hakilar hotu ba SAMES,” nia hateten iha servisu fatin Kampung Alor, Díli.
Nia hateten bainhira iha ona lista ofisiál ida ba medikamentu no produtu farmaseiutika sira mak orgaun fiskalizadór no autoridade sira bele kontrola tuir lista ne’ebé defenidu.
Nia esplika lista esensiál medikamentu Timor-Leste rejistradu tinan 2015, ne’e iha 402 items medikamentu kompostu husi esensiál, vitál no nesesáriu. Maibé fasilidade saúde sira-nia utilizasaun aimoruk la hanesan, ezemplu iha HNGV 402 items, iha 115 items de’it mak bele uza iha postu-saúde.
Iha parte seluk, Xefe Unidade Oncologia, iha HNGV, Oncologista, João Teodosio Amaral hateten durante ne’e sira iha akordu ho ospitál balun iha rai-liur fornese aimoruk, tanba aimoruk seidauk disponivel iha rai-laran.
Nia dehan tratamentu oncologia ne’ebé funsiona ona mak tratamentu kemoterapia ambulatóriu ba pasiente sira ne’ebé iha faze tratamentu mantein, tanba aimoruk iha rai-laran laiha, entaun sira fila husi ospitál rai-liur lori ho kedas aimoruk.
“Ita iha akordu ho ospitál sira, entaun pasiente sira fila mai ho kedas sira-nia aimoruk. Nune’e mak ita bele kontinua halo tratamentu, maibé ba oin oinsa ita sosa rasik aimoruk,” nia hateten.
Nia hateten sira submete ona lista medikamentu ba oncologia nian ba konsellu diretiva HNGV atu bele kontinua enkamina ba Ministériu Saúde hodi konsidera no integra iha lista esensiál medikamentu Timor-Leste nian.