- Publika iha: 28 Outubro 2014
Membru Parlamentu Nasional kestiona projetu fisiku Programa Dezenvolvementu Distrital (PDD II) iha distritu balun kompania abandona tiha.
Deputadu, César Valente de Jesus, hateten projetu fisiku PDD II iha sub-distritu Metinaro, liu –liu dada bee iha suku Duyung, aldeia Benunu kompania abandona ona durante tinan tolu.
Nia haktuir, Ministerio Administrasaun Estatal (MAE) iha obrigasaun atu halo intervensaun bolu atensuan ba iha kompania sira ne’e, tanba projetu ida ne’e pagamentu 80% tiha ona.
“Hau husu responsabilidade MAE nian ba projetu dada bee mos iha suku Duyung Aldeia Benunu Metinaro tinan 2011-2012 paradu kompania simu ona 80% ita bo’ot sira nia responsabilidade,” Deputadu Valente kestiona, iha plenaria Parlamentu Nasional.
Maske la temi kompania nia naran ne’ebe kaer obra ne’e, maibe kompania lokal, tanba ne’e presiza atu halo intervensaun hodi ejiji sira nia responsabilidade.
Entretantu Deputada Josefa Alvares Pereira Soares, kestiona kona ba rehabilitasaun merkadu Baucau, estraga totalmente fatin kultura balun ne’ebe hanesan asset estado nian.
Nia mos husu atensaun ba administrador distritu sira bainhira foti desizaun ruma a projetu fisiku sira, tenke kordena ho ministeriu, nune’e labele estraga fali fatin seluk.
“Hau fo ezemplu; rehabilitasaun merkadu estraga totalmente ita nia karakteristika arkitetonika ne’ebe ita tenke husik hanesan patrimonio estado,” Deputada Pereira kestiona.
Hatan ba kestaun ne’e, Sekretario Estado Dezenvolvementu Local, Samuel Mendonça, rekonese projetu dada bee moos ne’e porjetu 2011 nian no bolu ona atensaun ba kompania sira atu responsabiliza.
“Foin dadaun hau ba haree no hau fo ona ultimatum to’o fin du mes tenke resolve lalais, no tama tinan 2015 laiha ona dividas,” Mendonça hateten.
Nia hatutan, iha 2014 la implementa projetu fisiku, tanba sei iha dividas lubuk ida mak seidauk resolve to’o agora, nafatin fo atensaun ba projetu sira ne’ebe la remata iha tinan hirak liu ba.