- Publika iha: 26 Janeiro 2015
Iha tinan 2014 Diresaun Nasional Servisu Agua konsege rekolha taxa husi bee moos ho montante $129,049.83 hodi kontribui ba dezenvolvementu iha rai laran.
Diretor Nasional Servisu Agua (DNSA), Gustavo da Cruz, hateten governu foin bele aplika tarifa bee moos iha suku sia, uma kain hamutuk 2,808 iha distritu Dili maioria seidauk tanba sistema distribuisaun be seidauk diak.
Nia hatutan, tarifa ne’ebe DNSA aplika kada kubiku ou 1000 liter (1000 liter kubik) bee moos ho kustu sentavus 20, ne’e se mak uja barak liu sei selu ho kustu bo’ot.
“Tinan 2015 ne’e, ami tenta atu melhora diak liu tan sistema ne’e atu ita nia komunidade sira bele hatan hotu bee mos no bele ona aplika mos tarifa,”Diretor da Cruz hateten, iha Kaikoli, Dili.
Nia hatutan, taxa husi bee moos ne’ebe DNSA rekolha la’os deit husi tarifa bee moos, maibe husi kustu laboratorium, kustu ligasaun bee no fa’an bee moos ba komunidade.
Nia rekonese, katak bairo balun iha Dili laran seidauk asesu ba bee moos, maibe ba komunidade sira ne’ebe aplika ona tarifa ne’e garantia asesu bee moos ho kualidade durante 24 oras nia laran.
Iha parte seluk, Deputadu Natalino do Nascimento, hateten buat barak mak lolos kontribui ba iha receitas domestiku, maibe governu laiha politika ida diak atu rekolha taxa sira ne’e hanesan setor eletrisidade, bee mos.
Nia hatutan, kada tinan governu gasta osan bo’ot hodi investe ba iha setor rua ne’e atu bele hatama fali reseitas ba estado, maibe seiduak la’o ho maximu.
“Entaun reseitas domestika ki’ik,” nia dehan.
Entretantu komunidade Comoro, Jeremias da Silva, hateten nudar sidadaun iha obrigasaun atu kontribui ba iha prosesu dezenvolvimentu pais nian liu husi selu tarifa ba eletrisidade no bee mos, maibe tenke hadia sistema atu labele mosu dezentendementu entre komunidade.
“Balun selu ona tarifa bee moos, maibe barak mak sei gratuita,” nia dehan.
“Hau hanoin sistema ne’e mak tenke hadia, aplika tarifa karik ba ema hotu laos uma kain ida rua deit mak selu maioria gratuita ne’e labele,” nia dehan.