- Publika iha: 03 Abril 2024
Grup Artes Marsiais Ikatan Keluarga Silat Putra Timor-Leste (IKS-PTL) no Persaudaraan Setia Hati Terate (PSHT) iha komitmentu atu buka tuir membru sira ne’ebé durante ne’e envolve iha konfrontu, hodi rezolve tuir lei.
Koordenadór PSHT Dom Aleixo nian, Renato Doutel hatete, membru sira ne’ebé durante ne’e envolve iha konfrontu, estrutura arte marsiais sei buka tuir, atu nune’e bele mai hodi rezolve tuir lei, no lideransa arte marsiais mós sei halo diálogu ho autoridade lokál, tanba durante problema mosu lideransa arte marsiais la bele kontrola tanba arte marsiais governu suspende hela.
“Agora daudauk ami enkontru ho komandante sira, ami atu buka fali membru sira ne'ebé envolve iha konfrontu sira ne'ebé akontese para sé mak envolve iha problema ne’e buka para rezolve tuir lei ka hanesan xefe suku sira ami sei halo fali diálogu ida iha suku, nune’e ami bele rezolve problema sira-ne’e, tanba durante ne’e akontesimentu hotu organizasaun la kontrola nia ema tanba organizasaun governu suspende hela atividade,” Nia hateten iha eskuadra Dom Aleixo, Comoro, Díli.
Nia haktuir sei fó sai informasaun ba membru sira tomak katak atividade organizasaun nian taka hela, maibé ema ho ema ne’e la'o ba mai hela, tanba ne’e husu atu labele halo problema hakmatek ba atu nune’e labele halo problema iha bairru laran, ba se mak kontinua halo problema ne’e krime tenke kaer, tanba krime la tolera.
Iha fatin hanesan Responsavel IKS-PTL Beto Barat, Zeferino Gomes hatete, hanesan joven hakarak kontribui hodi kria paz no estabilidade iha Timor-Leste, maibé ikus situasaun sira-ne’e mosu, tanba joven sira ne'ebé la iha konsiénsia hodi kria konflitu iha bairru laran.
“Ida-ne’e konsiénsia ema nian, tanba ita hatene katak estadu agora suspende tan atividade arte marsiais sira, tanba ne’e mak oknun sira ne'ebé maka hakarak hafo'er organizasaun nia naran, dala barak problema privadu, maibé kose fali ba organizasaun ikus mai provoka situasaun no halo problema ne’e sai boot,” nia dehan.
Nia salienta tan katak ida-ne’e hanesan oknun sira ne'ebé la iha responsabilidade no konsiénsia hodi kria situasaun sira hanesan ne’e, tanba ne’e estrutura arte marsiais tuur hamutuk ho autoridade lokál no seguransa, ba oin bele servisu hamutuk hodi kria paz no estabilidade iha bairru laran.