- Publika iha: 24 Abril 2014
Membru Parlamentu Nasional kestiona maka’as kona ba motor no kareta ne’ebe para arbiru iha dalan sira hodi hamosu engrafamentu iha sidade laran.
Deputadu Eladio Faculto, hateten kareta no motor sira balun para iha lina zebra cross, trotoar leten no balun para los iha dalan tama ba bairo nian, ne’e kompetensia Polisia Tranzito nian atu kontrola.
“Seluk fali sira fa’an kareta no motor, tau iha dalan- dalan, ne’e mos para arbiru deit,” Deputadu Faculto kestiona, iha Parlamentu Naisonal.
Tanba ne’e nia husu ba Polisia Nasional Tranzito atu haree kestaun ne’e no tenke kontrola ema sira ne’ebe para kareta no motor arbiru.
Hatan ba preokupasaun ne’e, Komandante Tranzito Nasional, Inspektor Xefe Antonio L. C. Soares, rekonese kestaun ne’e no ida ne’e hanesan problema ida atu buka solusaun.
“To’o agora ita seidauk iha fatin estasionamentu ida ba sira,” Xefe Soares hateten via telemovel.
Aleinde ne’e, nia dehan, Polisia Tranzito mos seidauk halo buat ida tanba seidauk iha baze legal ida kona ba kareta no motor arbiru ne’e.
Maibe kuandu sira para iha lina zebra cross, nia dehan, polisia tranzito sei prende no tuir regulamentu orgaun autoridade sira sei selu multa $12,00 to’o $40,00 iha Diresaun Nasional Transporte e Terestres (DNTT).
Iha fatin seluk komunidade Ciquito Oliveira, hateten, kondutor balun para arbiru iha zebra cross tanba balun seidauk hatene funsaun husi lina zebra cross.
“Ne’e papel tranzito nian fahe informasaun ba sira,” nia dehan.