- Publika iha: 05 Setembro 2015
Diretor Ezekutivu organizasaun Fundasaun Mahein (FM), Nelson Belo, hateten ladun nesesariu ba Ministeriu Justisa harii tan Polisia Sientifica Investigasaun Kriminal (PSIK), tanba iha ona Servisu Investigasaun Kriminal (SIK) .
Tanba tuir nia, knar PSIK ho SIK hanesan deit, hotu-hotu halo’o investigasaun ba kazu krimi.
“La neserariu no hau lamenta tebes atu hamosu tan instituisaun ne’ebe mak halo knar hanesan ho instituisan ne’ebe mak iha tiha ona,” Belo lamenta, iha Hotel Timor, Dili.
Tuir lolos, nia dehan, fo deit kapasitasaun masimu ba SIK hodi halo knar diak liu tan, duke harii tan instituisaun seluk ne’ebe mak halo knar hanesan.
Hatan ba kestaun ne’e Ministru Justisa (MJ), Ivo valente, hateten PSIK foin mak estabelese iha tinan ne’e (2015), no nia papel la hanesan ho Servisu Investigasaun Kriminal iha Instituisaun Polisia Nasional Timor-Leste (PNTL) nian.
Nia dehan, PSIK sei halo investigasaun ba kazu droga, brankeamentu kapitais, korupsaun, no krime pasa fronteira.
“Ita foin mak estabelese iha tinan ida ne’e, sira mak uza intelejensia hodi deskobre verdade, no atu kaer kazu kompleksu sira,” Ministru Valente hateten.
Enkuantu iha fatin seluk Komandante Servisu Investigasaun Kriminal (SIK), Superintentende Ludgeiro Lay, hateten SIK la’o tuir lei kodigu penal ne’ebe iha ona, e kazu saida deit mak mosu, SIK sei halo hotu intrega ba Ministeiru Publiku no Ministeriu Publiku mak iha kompetensia atu delega ba see.
“Servisu no kolabora hamutuk ho objektivu ida deit harii dame no paz iha ita nia nasaun, hodi sulan kriminozu sira, ida ne’e mak ita nia prinsipiu atu lori instituisaun sira ne’e ba oin” Komandante Lay hateten.