Ministeriu da Saude Uniformaliza Informasaun Promosaun Saude

Ministerio da Saude (MdS) uniformaliza materia komunikasaun liu –liu mensagen saude, ne’ebe sei fasilita pesoal sira halo atividade promosaun, edukasaun saude ba komunidade sira.

Diretor Nasional Saude Publiku, Pedro Canisio hateten ministerio iha obrigasaun atu dezenvolve no uniformaliza mensagen sira ne’e, tanba nia mak nain ba informasaun sira kona ba saude nian.
Nia dehan, materia komunikasaun sira ne’e la’os foun ba komunidade sira, maibe atu dezenvolve sai pakote ida deit, nune’e entidade ne’ebe servisu ba promosaun saude bele utilize.
“Ita tenke uniformaliza mensagen sira ne’e, labele ministerio hato’o mensagen ida husi NGO seluk entaun halo komunidade konfuzaun no sira lahatene atu uza informasaun ida ne’ebe,” nia hateten iha salaun Palacio da Sinzas, Kaikoli, Dili.
Nia hateten, pakote materia komunikasaun ne’e kompostu husi IEC material, livru istoria, jogus ne’ebe hakerek ho linguagen simples atu komunidade sira bele kompriende no tau iha pratika lor-loron.
Nia dehan, informasaun sira ne’e koalia liu kona ba ambiente liu –liu mantein ambiente moos, saude maternu infantile (imunizasaun) no nutrisaun.
Nia informa, ministerio sei halo kopia barak ba material sira ne’e hodi distribui ba iha fasilidade saude hotu no eskola sira atu profesores sira utilize hodi hanorin labarik sira.
Entretantu, Xefe Departamentu Promosaun e Edukasaun Saude Misliza Vital hateten sira identifika iha diferensia mensagen ne’ebe mosu iha komunidade sira nia let kona ba saude, tanba ne’e pakote ne’e importante tebes atu fasilita servisu promosaun saude.
“Ita rona iha atividade barak promosaun saude barak mak la’o iha eskola sira, maibe ita lahatene IC material ne’ebe uza mai husi ne’ebe,” nia hateten.
Nia dehan, sira iha ona livru istoria 6 ne’ebe fo mensagen importante saude nian ba iha labarik no komunidade sira tau iha pratika lor-loron.
Nia hatutan, pakote ida ne’e espesifiku ba labarik sira no adolcentes ne’ebe barak liu sei distribui ba iha eskola sira.
Nia informa, depois halo konsultasaun ikus sei aprezenta ba iha konselho diresaun ministerio hodi hetan apresiasaun.
Antes halo distribuisaun ba iha fasilidade saude no eskola sira, nia dehan sei halo mos sensibilizasaun uluk ba iha professional saude no professor sira kona ba oinsa atu uza materia sira ne’e introdus ba komunidade no estudante sira.