UNPAZ Iha Sistema Rasik Hodi Garante Kualidade Edukasaun

Vise Reitor Universidade da Paz (UNPAZ), Manuel dos Santos hateten UNPAZ iha nia sistema rasik hodi garantia nia kualidade ensinar.

Nia dehan, kada semester tenke iha enkontru dala 16 mak bele tuir ezame, tinan ida sa’e semestrer rua iha semester inpar (ganjil) ho par (genap).
Nia dehan, semester inpar ne’e tuir kurikulum Ministerio Edukasaun nian, semester ida ne’e hahu husi fulan Janeiro, depois fulan neen tiha mak ba semester par (semester rua, hat, neen to’o walu).
“Ami nia mekanismo hanorin iha UNPAZ kada semester ida pertemuan dala 16, estudante ne’ebe mak la tuir to’o 16, nia sei la tuir TAS (test akhir semester), signifika nia kredit (la pasa), tenke ulang fali mata kuliah ne’ebe nia kredit,” nia dehan.
Alende ne’e, nia dehan dosentes atu hanorin estudante sira mos haree ba SKS (sistem kredit semester), SKS ida hanorin oras ida, SKS tolu entaun hanorin to’o oras tolu.
“Sistema ida ne’e mak UNPAZ implementa hodi garante kualidade hanorin iha Universidade da Paz,” nia hateten.
Portantu, avaliasaun ne’ebe lolos kona ba kualidade ga la’e ema sira ne’ebe akaba husi UNPAZ, nia dehan ne’e so publiku. “Publiku maka bele halo penilaian, la’os universidade,” nia dehan.
Enkuanto total dosentes ne’ebe mak hanorin iha UNPAZ agora dadaun ne’e, nia dehan hamutuk dosentes 300 (permanente ho kontratado), maioria ho nivel edukasaun S2, S3, sira lulusan husi Indonesia no mos husi UNPAZ rasik.
“Tanba tuir lei edukasaun nian, hateten S1 labele hanorin S1, tanba ne’e mak ami obriga dosente ne’ebe mak nia nivel edukasaun S1, nia bele hili, sai staf iha administrasaun ou sai deit, tanba ne’e mak sira iha obrigasaun foti S2 hotu,” nia dehan.
Entretantu Sekretario Nasional rede edukasaun Timor-Leste Coalition for Education (TLCE), Jose Monteiro hateten kada universidade iha nia maneira rasik hodi hanorin estudante sira atu atinje nia kualidade.
Nia dehan, kada semester pertemuan to’o 16, tinan ida semester rua maibe tinan ida semester tolu, ne’e bolu semester pendek.
“Hau hanoin ida ne’e la afeta direta ba kualidade estudante nian, kada universidade ida-idak ho nia silabus planu de aula, oinsa sira ne’e atinji iha periode semester ida remata atu hetan saida no estudante ne’ebe sira prepara ne’e nia kapasidade oinsa,” nia dehan.
Tanba ne’e, nia dehan, atu hanorin estudantes sai kualidade iha universidade ida, ida-idak iha nia maneira noplano de aula rasik tanba Ministerio Edukasaun seidauk iha kurikulum.