Professor Edukasaun Inkluzivu 30 Tuir Formasaun Lian Jestual

Diretor Jeral iha Ministeriu Edukasaun, Joventude no Desportu (MEJD), Antoninho Pires hateten professores husi edukasaun inkluzivo nain 30 tuir ona formasaun kona ba lian jestual, letra braile inklui maneira atendementu ba estudantes ho kadeira roda iha eskola.

Nia hateten, profesores nain 30 ne’e mai husi munisipiu tolu maka munisipiu Aileu, Baucau no munisipiu Bobonaro, kada munisipiu ema nain 10 e formasaun ida ne’e ho objetivu atu hasa’e kualidade edukasaun iha Timor.
“Formasaun ne’e ligadu ho politika edukasaun inkluzivu nian, hasa’e kualidade edukasaun iha Timor –Leste,” nia hateten, iha Dili.
Nia dehan, iha formasaun ne’e profesores nain 30 deit, depois maka sira bele habelar fali ba professor sira seluk iha eskola sira.
“Ema hotu iha direitu atu asesu ba edukasaun, laiha diskriminasaun inklui defisientes, sira iha kualidade oin oin, ho ida ne’e iha halo formasaun ba professores sira konaba lian jestual ba sira ne’ebe difisiante koalia, brail ba sira ne’ebe difisiente matan, nune’e sira hanorin estudante sira,” nia dehan.
Nia hateten, profesores edukasaun inkluzivu maioria maka tuir ona formasaun, falta deit husi munisipiu Manatuto, Liquisa inklui Ermera maka seidauk.
Portantu, nia dehan formasaun ne’e realize tanba servisu hamutuk entre Ministeriu Edukasaun ho governu Australia liu husi Embaixada Australia iha Timor-Leste.
Entretantu Koordenador Edukasaun Embaixada Australia, Deonisio Martins Sarmento hateten formasuan ida ne’e hanesan programa prioridade ministeriu nian e governu Australia ajuda fasilita formasaun ne’e.
“Governu Australia ajuda implementa programa ne’e, atu tau iha pratika politika edukasaun inkluzivu iha Timor-Leste,” nia dehan.
Nia dehan, iha formasuan ne’e fo konesementu ba iha professor sira kona ba lian jestual, letra braile hodi uza hanorin estudantes iha edukasuan inkluzivu.