- Publika iha: 03 Abril 2014
Feto Potensial husi distritus kestiona maka’as servisu Pontu Vokal husi Sekretaria Estado ba Promosaun Igualidade (SEPI) ne’ebe monta iha 13 distritus, tanba durante ne’e sira nia atividades laiha rezultadu.
Feto potensial husi distritu Ainaro, Ana Maria Pereira, hateten atividades Pontu Vokal iha distritu Ainaro taka demais no la involve feto potensial sira no hein deit loron nasional feto mak sira hala’o atividade.
“Durante ne’e ami laiha vocal point no atividade sira hotu hein deit loron bo’ot mak halo atividade,” Pereira kestiona, bainhira partisipa enkontru iha salaun Rosa Muki Bonaparte,Kaikoli, Dili.
Preokupasoens hanesan hato’o mos husi feto potensial distritu Bobonaro, Lucia Pina, katak sira seidauk hatene servisu no atividade vocal point nian iha distritu hodi promove partisipasaun feto iha nivel distrital no nasional.
“Antes hau mai tuir enkontru ne’e, hau husu duni dadus kona ba numeru feto potensial iha distribu Bobonaro, maibe sira dehan laiha, lolos sira tenke tun ba treinu koalia ho feto potensial sira, feto emprezario sira iha distritu,” Pina hateten.
Tanba ne’e nia dehan, pontu vokal no grupo trabalho jeneru la hala’o sira nia knaar ho diak, tanba sira la fahe informasaun ne’ebe husi nasional ba feto sira iha area remotas.
Iha okaziaun ne’e feto potensial sira husu ba SEPI, pontu vocal labele funsiunario publiku, diak liu hili feto potensial ida iha kada distritu sai pontu vocal, tanba funsiunario sira servisu deit iha kantor.
Hatan ba kestaun ne’e Sekretaria Estado Idelta Maria Rodrigues, rekonese katak servisu pontu vokal no grupo trabalhu jeneru iha distritu iha problema kona ba konesementu (menus).
“Nunka hato’o rezultadu servisu hanesan prezidente grupo trabalho jeneru no vocal point, maibe nudar fali sekretario jeral distritu,” nia dehan.
Tanba ne’e, nia hateten, iha tinan ida ne’e SEPI sei kapasita pontu vocal iha 13 distritus, hasa’e sira nia konesementu no abilidade hodi buka solusaun ba problema ne’ebe feto sira hasoru iha nivel sub-distritu.
“Tempu ona atu hakbi’it sira nia kapasidade atu atende preokupasaun hotu husi rural, nune’e labele depende ba nasional, se la’e atividade mos hein nasional tun mak hala’o,” SE Rodrigues hateten.
Aleinde ne’e nia dehan, SEPI mos sei kria kondisaun ba sira hanesan transporte no komputador, atu nune’e sira bele hala’o sira nia servisu ho efetivu liu tan.