Involvementu Feto Iha Petroleum No Minerais Atinji 30%

Maske servisu petroleum no rekursu minerais kategoria servisu mane nian, tanba konsidera todan, maibe realidade feto Timor oan barak mak hahu hatudu sira nia kapasidade iha area ida ne'e.

Ministeriu Petroleum no Rekursu Minarais (MPRM), Alfredo Pires, hateten involvementu feto iha area petroleum no minerais positive tebes,mesmu parte balun presiza halo esforsu nafatin. 

"Iha nivel xefia no diresaun komesa okupa husi feto sira hanesan Prezidente Board Timor Gap feto ida, Autoridade Nasional Petroleum (ANP) tekniku geologia, petroleum, geofisika feto iha 30 resin, balun sei estudu hela no iha ministerio rasik diresaun nasional minerais no administrasaun finansas lidera husi feto nian rua," Ministru Pires hateten, bainhira halo abertura ba wokshop EITI ho Media Nasional, iha salaun Jacinto,Kuluhun, Dili. 

“Ne’e prosesu naruk ida, maibe hau bele dehan katak iha Timor –Leste partisipasaun feto iha petroleum as liu kualker nasaun seluk, tanba ita fo atensaun ba ida ne’e,”.

Nia hatutan, MPRM fo importansia ba feto tuur iha kargu importante sira, la'os tanba sira feto, maibe feto sira iha duni kapasidade no esperiensia ne’ebe diak ba area sira ne’e. 

Iha parte seluk, Diretora Diresaun Nasional Minerais (DNM), Elga Pereira, hateten importante mak feto sira fiar an no hatudu kapasidade katak sira mos bele iha area ida ne'e.

"Dala barak investor sira husi rai liur mos dezafia feto sira nia kapasidade iha area petroleum no minerais, tanba Timor –Leste nasaun foun," nia dehan.

Tanba ne'e nia husu ba feto maluk sira ne'ebe iha kapasidade iha area ida ne'e, hatudu an no labele moe kompete ho mane sira.

“Ba alin feto sira ne’ebe iha kapasidade ba area ida ne’e labele moe, buka aprende tan liu husi servisu lor-loron fiar an nafatin, atu nune’e ita bele kompete ho mane sira,” nia enkoraja.

Nia hatutan, servisu ne’ebe DNM halo mak regula atividade ne’ebe iha relasaun ho operasaun minerais, hanesan lisensa ba kompania sira ne’ebe hala'o atividade tula fatuk no rai henek no halo inspesaun fiskalizasaun ba atividade sira ne’e.