Feto 65 Tuir Formasaun Kona ba Jestaun Lideransa Nian

Feto membrus konselho suku hamutuk nain 65 tuir formasaun kona ba jestaun lideransa, nian ne’ebe organiza husi organizasaun feto Fundasaun Alola.
Enkuantu partisipante sira ne’e mai husi suku 24 iha munisipio 12 inklui Regiaun Administrativu Espesial Oe-Cuse-Ambeno (RAEOA).

Diretora Ezekutivu Fundasaun Alola (FA), Alzira Reis hateten durante ne’e sosiedade preokupa maka’as ba feto sira nia kapasidade lideransa ne’ebe sei minimu, tanba ne’e ho formasaun ida ne’e bele eleva tan kapasidade feto sira nian, liu –liu sira ne’ebe tur ona iha estruturas aldeia no sukus.
Nia dehan, sira iha formasaun oi-oin ba feto potensial sira tanba hakarak asegura kuantidade no kualidade feto nia partisipasaun iha nivel munisipius, liu –liu iha nivel suku nian.
“Fundasaun Alola hakarak duni apoia feto potensial sira, tanba sira mak lideransa base iha nivel suku nian, atu nasaun ida sai forte ne’e tenke hahu husi nivel suku nian”, nia hateten, iha nia knar fatin Mascarenhas, Dili.
Nia hatutan, Fundasaun Alola prontu servisu hamutuk no halo akompaniamentu ba feto potensial sira iha nivel suku hodi hakat ba oin.
Nia apresia ho esforsu, korajen no servisu maka’as ne’ebe feto sira halo iha nivel suku hodi haforsa dezenvolvimentu nasaun Timor –Leste nian iha nivel suku.
Entretantu, Xefe Departamentu Jestaun no Monitorizasaun Insentivu Finanseira Suku, Doddy Maia apresia ho vontade no apoiu Fundasaun Alola nian atu fo kapasitasaun ba iha membru konselho sukus, liu –liu ba feto sira.
“Ami orgulhu no kontente tebes ho programa ne’ebe Fundasaun Alola halo no husu ba partisipante sira atu durante loron 3 ne’e bele marka prezensa masimu,” nia apela.
Nia mos, husu ba partisipante sira atu ativu durante formasaun liu –liu la komprende buat ruma tenke husu hodi haklean liu tan konesementu ne’ebe iha, atu nune’e fila ba suku bele implementa ho diak.
Iha parte seluk, Delegada husi Aldeia Falimanu suku Fatukero, Munisipio Ermera Adriana Ximenes hato’o agradese ba iha Fundasaun Alola tanba fo ona oportunidade ba sira atu tuir formasaun kona ba lideransa.
“Nudar feto, hau sente orgulhu tebes ho formasuan ida ne’e no hau hein katak ho formasuan ida ne’e bele aumenta tan hau nia kapasidade nudar lider feto ida,” nia orgulhu.
Enkuantu, formasaun ho titlu “Haforsa Kuantidade no Kualidade Membrus Konselhu no Feto Potensial iha Lideransa” ne’e hala’o durante loron tolu hahu husi 23-25 fulan Otubru.