- Publika iha: 18 Março 2024
Diretora Movimentu Feto Foin Sa’e Timor-Leste (MOFFE), Yasinta Lujina hateten, formasaun ne’ebé Moffe-Care realiza iha salaun Delta Nova foin lalais, ho tema “Haforsa Kna’ar Lideransa Feto ba atinji Igualdade Jéneru” hanesan forum atu halibur lideransa feto komunitaria sira hodi sira fahe hanoin no esperiénsia ba malu atu bele haforsa lideransa komunitária feto sira-nia papél iha suku.
Nia dehan,forum refere realiza ha ámbitu selebrasaun ba loron internasional feto iha loron 8 Marsu, no hakarak halibur lideransa komunitária feto inklui xefe suku feto, xefe aldeia nomós delegada sira no reprezentante juventude feto kada aldeia nomós kada suku nian.
“Objetivu husi atividade loron ohin nia iha parte importante rua maka ita realiza dahuluk. Ita atu halibur maluk lideransa komunitária feto sira atu loke espasu oinsa sira bele ko’alia hamutuk hanesan dialogu ida hodi hato’o sira-nia hanoin liga ho esperiénsia ne’ebé sira iha.
Haree ba iha kargu ne’ebé sira lori hela durante tinan hitu (7) nian hanesan lideransa komunitária iha suku. Daruak nian maka atu haforsa tan sira-nia papél ne’ebé sira hetan ona liuhusi eleisaun suku ne’ebé ita hala’o ona tinan kotuk, liu-liu sira atu haknaar an haree liuba iha PNDS Planu Nasional Dezenvolvimentu Suku nian,” nia informa tan.
Nia hatutan, sei iha tan sesaun ne’ebé loke espasu ba lideransa komunitária feto sira atu fahe esperiénsia ba malu durante mandatu, sesaun ba sira atu hato’o planu servisu, tanba haree lideransa sira-ne’e mai ho planu no programa ne’ebé la hanesan atu dezenvolve iha nivel suku liu-liu prioridade sira liga ho PNDS nian.
“Ko’alia kona-ba lideransa feto, ita nafatin esforsu hodi kore maluk feto sira liu-liu abitua ona husi sosiedade katak, mane mak nafatin lidera. Tan ne’e, husi atividade ida ohin ita realiza ne’e atu fó espasu ba maluk feto sira hodi kore sira-nia an, atu nune’e bele fó espasu ba feto maluk sira ne’ebé seidauk iha oportunidade atu bele hatudu sira-nia motivasaun no vontade atu prepara an di’ak liután hodi kompete iha etapa sira ne’ebé sei tuir mai,” nia dehan.
Nia salienta, prosesu hirak ne’ebé la’o ona haree ba iha nasional nian, parlamentu iha mudansa bo’ot tebes atu esforsu di’ak liután bele halo mudansa to’o iha nivel baze sira.
Nia espera katak husi mudansa refere feto maluk sira ne’ebé seidauk hetan oportunidade iha etapa tuir mai no sensibilizasaun sempre hala’o hela de’it la’ós ba feto maluk sira maibé ba sosiedade sira hotu.
Iha sorin seluk, Xefe Suku Kampung Alor, iha kapital Dili, Estela Aleixo, hatete atividade forum refere hanesan espasu ida ba lideransa komunitária feto sira atu partisipa hodi fahe esperiénsia no servisu ne’ebé hala’o ona iha komunidade nia le’et durante simu mandatu tinan hitu nia laran, atu servisu hamutuk ho komunidade haree ba problema ne’ebé komunidade hasoru loron-loron.
“Hanesan lideransa feto ida, iha hanoin hodi kompete iha eleisaun suku nian, atu hatete katak feto prontu atu lidera iha fatin hotu no iha momentu ne’ebá apoiu ne’ebé ha’u hetan husi feto maluk sira seluk, komunidade nomós inklui ha’u-nia família rasik suporta tebes ha’u hodi kompete ba iha eleisaun suku nian.
Ha’u realiza ona esperiénsia ne’ebé iha, la barak maibé servisu sira ha’u halo hanesan apoiu iha Suku hanesan delegada no xefe juventude, husi esperiénsia hirak ne’ebé ha’u iha mak lori ha’u ba kompete iha eleisaun no hetan mós suporta másimu husi familia sira. Ne’e hanesan responsabilidade bo’ot ida ba ha’u,hanesan inan nomós lideransa komunitária iha suku Kampung Alor,” tenik nia.