- Publika iha: 15 Abril 2014
Sekretariu Estadu Seguransa (SES) oferese motorizadas 26 ho tipu honda ba Polisia Komunitaria, hodi fasilita sira nia servisu iha baze ho diak liu tan.
Xefe Departamentu Polisia Komonitaria Nasional (DPKN), Adjuntu Helena Das Dores Alves, hateten motor sira ne’e governu entrega ba komando iha fulan Janeiru 2014 no sosa ho orsamentu tinan 2013 nian.
“Agora dadaun sei iha hela Komando Nasional, iha tempu badak sei halo distribuisaun ba iha komando distrital sira,” Adjuntu Das Dores Alves, iha Kaikoli, Dili.
Nia hateten, durante ne’e Polisia Komunitaria sira hala’o servisu iha baze sein transporte, sira la’o deit.
“Agora bele ajuda ona servisu polisia komunitaria iha baze, kada komando sei hetan hira, hau seidauk hatene,” nia hateten.
Iha parte seluk membru Komisaun B (seguransa, defeza, negosiu estranjeirus), Deputada Anna Ribeiro, hateten motorizadas hirak ne’e bele ona fasilita sira nia servisu iha baze.
“Hau espera katak sira bele servisu ho efetivu liu tan,” nia dehan.
Maibe nia sujere ba governu tau atensaun mos ba manutensaun motor hirak ne’e, nune’e bele dura to’o kleur.“Hanesan troka oli no seluk tan,” nia sujere.