- Publika iha: 03 Fevereiro 2024
Komadante Tranzitu Seguransa Rodoviaria Nasionál Superintendente Asistente Luis da Costa hateten sira serivsu hamutuk ho Diresaun Nasionál Transporte Terrestre (DNTT) instala sinais tranzitu foun iha fatin neen (6) iha sidade kapital Dili, ne’ebé sempre akontese engarafamentu.
Nia dehan fatin neen ne’e mak instala sinal tranzitu S iha estrada tasi ibun embaixada Xina nia oin la autoriza para motor no kareta iha parte ba tasi nian, fatin segundu iha tribunal distrital Dili nia oin to’o fatin hein kareta instala sinal S katak la autoriza para motor no kareta, fatin datolu iha Bebora edifisiu GMN nian mai to’o Tuguh Pramuka Mandarin diresaun ida deit laos ona rua, fatin dahat iha estrada kantu entrada Palasio Governu to’o mai kantu volta mai Parlamentu Nasionál instala sinal letra S katak labele para, fatin da-lima estrada husi sentru saúde Formosa diresaun ida deit mak sa’e mai deit la autoriza tun, fatin da-neen iha loja vaganja nian nian instala ona sinal P katak bele para maibe ho makina trabalho hela la autoriza para iha ne’eba.
“Sinais foun dalaruma ita nia motorista sira ladun atensaun tanba ne’e aproveita oportunidade atu avizu ba motorista sira hotu lori kareta no motor hare ba sinais sira ne’e,” nia hateten
Nia hateten sira fo toleransia semana ida tanba iha faze sosializasaun, maibe liu periodu ida ne’e transporte ne’ebé viola sinais sira ne’e sei hetan sansaun koima.
Nia hatutan ekipa mos halo hela kontrolu ba sidadaun sira ne’ebé hola inisiativa rasik taka dalan públiku sira ba atividade privadu nian.
Iha parte seluk, Motorista António Soares hateten respeita desizaun polisia no DNTT nian atu muda sinais tranzitu, maibe importante tenke halo sosializasaun ne’ebé maximu ba públiku.
“Importante mak sosializasaun ba públiku atu hatene tanba hau fiar ema kuandu iha koñesementu sei kumpri sinais,” nia hateten.
Nia hateten presiza tempu atu sosializa sinais tranzitu foun ne’e ba públiku, liu-liu motorista sira lori transporte husi munisípiu tun mai sidade Dili tanba sira toman ona ho diresaun anterior dalaruma bele tama sala.