- Publika iha: 15 Abril 2014
Membru Parlamentu Nasional kestiona ho kareta Polisia Nasional Timor-Leste (PNTL) nian husi tinan 2012 ne’ebe atu halo lelan, maibe to’o agora seidauk.
Deputada Albina Marcal Freitas, hateten institusaun hotu-hotu inklui Polisia Nasional Timor-Leste ida-idak iha regras, katak kareta ne’ebe la uja ona iha posibilidade atu hala’o prosesu lelan.
“Tanba rai hela deit iha ne’eba mos estraga ambiente no bele mos halo kareta paragen laiha,” Deputada Freitas kestiona, iha Parlamentu Nasional.
Tanba ne’e nia husu ba komando atu bele hato’o kestaun ne’e ba parte patrimoniu estadu, hodi hare kestaun ne’e.
Hatan ba preokupasaun ne’e Xefe Logistika PNTL, Superintendente Basilio de Jesus, katak iha tinan 2012 komando hatama proposta lelan ba Ministru Defeza, hetan aprova, maibe ate a data seidauk, tanba atraza hosi parte ekipa patromonia estadu.
“Maibe sei halo lelan iha tinan 2014, iha fulan Marsu agora,” Superintendente de Jesus hateten.
Kareta sira ne’ebe atu lelan ne’e, nia dehan, iha kategoria rua ; balun diak hela maibe tama ketegoria lelan no balun at ona.
“Kareta diak, maibe kareta hirak ne’e tinan neen ona ba leten no estandar volume liu ona 150 ba leten,” Superintendente de Jesus dehan.
Nia dehan, total kareta ne’ebe atu halo lelan ne’e hamutuk 138, ne’ebe rekolha hosi unidade no departamentu husi komando distritu 13.
“Agora dadaun ami halo hela rejistu kada kareta, depois ekipa hosi patromonia estadu halo espesaun depois publika lelan ne’e ba publiku,” nia hateten.