- Publika iha: 15 Dezembro 2014
Membru Parlamentu Nasional kestiona servisu Sekretariado Tekniku de Administrasaun Eleitoral (STAE) nian durante ne’e, tanba Populasaun iha area rural barak seidauk iha kartaun eleitoral.
Deputadu Antoninho Bianco,sujere STAE tenke hadia sistema resensiamentu eleitoral no halo estensaun ba area kobertura, tanba iha area remotas liu-liu ferik katuas, defisiente sira barak seidauk iha kartaun eleitoral.
Tanba tuir nia, sistema ne’ebe iha sentraliza deit iha sub-distritu la to’o iha nivel sukus, ne’e dificulta ferik katuas, defisiente sira labele hetan kartaun eleitoral, labele la’o dook.
“Ami husu STAE tenke desloka ona ba iha nivel sukus no aldeia para ema hotu bele iha kartaun nune’e sir abele ejerse sira nia direitu iha tempu eleisaun sira hanesan mos sidadaun sira seluk,” Deputado, Bianco sujere, Iha Parlamentu Nasional, Dili.
Hatan ba kestaun ne’e, Direto Jeral STAE, Aquilino Manuel Branco, hateten STAE destaka ona pesoal iha 65 sub-distritus inklui mos halo mobile iha sukus balun hodi halo verifikasaun ba dadus.
Nia haktuir, resensiamentu ne’ebe hala’o iha fulan hirak liu ba sei remata fulan oin atu verifika deit dadus sira ne’ebe iha, tanba mosu kazu idozu “mate klamar” katak benefisiariu mate ona maibe familia uza kartaun hodi simu osan idozu.
“Ami halo hela resensiamentu iha 65 sub-distritu no mobile iha suku balun, tanba iha komunidade balun hela liu iha area remotas atu verifika ema ne’ebe mate ona hasai naran husi sistema,”nia hateten.
Nia hatutan, hahu tinan oin STAE sei halo fali resensiamentu foun iha 13 distritus hodi prepara ba iha elisaun sukus ne’ebe planu sei halao iha fulan Agostu tinan oin (2015).