- Publika iha: 06 Outubro 2023
Ezersísiu harii hamutuk ne’ebé realiza husi forsa nasaun lima kompostu husi Estadu Unidos Amerika, Nova-Zelandia, Australia, Japaun, Filipinas no Timor-Leste konsegue finaliza konstrui fasilidade tolu hanesan, eskola báziku filial Odelgomo Bobonaro, kazerna rua iha baze apoiu Metinaro, no loke estrada ba komunidade iha Metinaro.
Xefe Estadu Maior Forsa Armadas, Brigadeiro Jenerál José da Costa Trix, dehan, ezersísiu harii hamutuk ne'e objetivu hodi soslusiona problema ne’ebé povu no nasaun hasoru.
"Durante ezersísiu harii hamutuk ne'e ita-nia forsa husi nasaun lima (5) ne'e konsegue konstrui eskola ensinu filial Odelgomo Bobonaru, kazerna rua iha baze Metinaro nune'e mós konstrui dalan ba komunidade iha Metinaro no halo tratamentu saúde ba komunidade iha Bobonaro," nia dehan.
Nia dehan, ezersísiu refere nu’udar oportunidade di’ak ba F-FDTL, tanba bele aprende hamutuk hodi eleva sira-nia koñesimentu hamutuk kona-ba área siénsia militár nian liu-liu iha parte enjeñaria nian.
“F-FDTL tenke prepara an nafatin prontu atu fornese solusaun ba problema no komplexu sira seluk no intervensaun militár sira tenke iha kualker tempu, bainhira povu no nasaun presiza apoiu,”Xefe Estadu Maior Forsa Armadas Brigadeiro Jeneral Trix Dehan.
Enkuantu nia dehan, ezersísiu harii hamutuk tinan ne’e hola parte forsa na’in 218 kopostu hosi F-FDTL (110), Forsa Estadus Forsa Australia (69), Nova Zelandia (4), Japaun (16) militar Unidus Amerika (19).
Iha fatin hanesan Embaxadór Nova Zelandia, Philip Hewitt, hatete, Nova Zelandia kontente haree ezersísiu harii hamutuk iha tinan ne’e, tanba militar sira husi nasaun seluk inklui Militar Nova Zelandia bele aprende ho F-FDTL, nu’udar interkámbiu ida hodi partilla esperiénsia siénsia militár nian iha área enjeñaria nian.
Nia dehan, ba futuru Nova Zelandia sei hametin kooperasaun militár ho F-FDTL oinsa tulun Timor-Leste liuhusi apoia kapasitasaun rekursu umanu.
Entretantu Embaxadór Japaun ba Timor-Leste Tetsuya Kimura, louva ezersisu harii Hamutuk ne’ebé nasaun lima halo durante fulan ida no konsege responde ba problema balun ne’ebé komunidade hasoru nune'e mós sira bele aprende troka ideia hamutuk.
“Japaun kompromete katak sei kontinua haforsa relasaun bilaterál ho Timor-Leste liu-liu iha área militár liuhusi ezersísiu sira-ne’e,” nia dehan.
Tanba ne'e servisu kooperasaun ne'e tenke kontinua halo iha futuru, nune'e militár nasaun rua ne'e prontu servisu hamutuk iha kualker situasaun.