TLPDP Konstrui Ona Uma Formasaun Ba Rekrutamentu Membru Polisia Foun

Timor-Leste Police Development Program (TLPDP), konstrui ona uma formasaun hamutuk sala ualu (8) no kompleta ho fasilidade informatika no biblioteka ida hodi prepara ba rekrutamentu membru Polisia Nasional Timor-Leste (PNTL) foun.

Komandante Jeral PNTL, Komisariu Henrique da Costa, dehan konstrusaun uma formasaun ne'e Governu Australia liu husi parseiru TLPDP apoiu instituisaun PNTL hodi halo preparasaun ba planu rekrutamentu membru foun na’in 500 ne'ebe mak realiza iha tinan oin.

Nia dehan, parseriu TLPDP ne'e apoiu PNTL hahu kedan iha tinan 2004 sira apoiu konaba hadia kualidade formasaun profisional servisu PNTL atu servi povu ho nasaun.

"Maibe ohin ita nia parseiru TLPDP apoiu mos konstrusaun uma formasaun kompostu husi sala de aula 8 kompleta ho fasilidade informatika no biblioteka hodi prepara ba simu rekrutamentu membru PNTL foun," Komandante Costa dehan.

Nia dehan, apoiu parseiru TLPDP ba instituisaun PNTL laos deit ba iha area formasaun profisional, maibe halo mos preparasaun ba iha rekrutamentu membru polisia foun iha tinan 2024.

"Fatin ne'ebe TLPDP konstrui ne'e bele akumula ema hamutuk 240 deit, liu ida ne'e labele tanba ne'e presija tan konstrusaun foun ba fatin treinamentu," nia informa.

Tanba ne'e nia dehan, fatin treinamentu ne'ebe atu konstrui tan ne'e iha Rairobo Munisípiu Bobonaru nian bainhira halo rekrutamentu fatin iha ne'e la to'o bele utiliza atu halo treinamentu ba kandidatu PNTL foun.

Iha fatin hanesan, komandante interinu TLPDP, Mark Silverland hatete, apoiu Governu Australia husi parseiru TLPDP ba instituisaun PNTL tinan barak ona hahukedas iha 2004 to'o ohin loron nafatin halo koperasaun servisu hamutuk apoiu dezenvolvimentu ba instituisaun PNTL.

"Durante tinan barak ona hahu iha 2004 to'o agora Australia husi parseiru TLPDP halo koperasaun apoiu instituisaun PNTL diak tebes, tanba ne'e ami iha komikmentu bo'ot atu kontinua apoiu polisia, tanba ami iha adavizor hotu iha departamentu no unidade sira iha PNTL apoiu tekniku no formasaun ita nia PNTL sira," nia informa.

Nia dehan, TLPDP durante ne'e apoiu instituisaun PNTL iha area formasaun profisional no fornese ekipamentu fasilidade sira ne'ebe PNTL presiza atu halo servisu asegura seguransa ba povu no nasaun Timor-Leste ho diak.

Entretantu tuir dadus orsamentu ne'ebe TLPDP hasai ba konstrusaun edifisiu ne'e iha sentru Formasaun Polisia hamutuk $400,000 ho sala 8 kompleta ho fasilidade biblioteca, mesa, kadeira no ekipamentu informatika komputador hamutuk 64.