- Publika iha: 10 Outubro 2023
Governu liu husi Ministeriu Defeza ho Komandu FALINTIL-Forsa Defeza Timor Leste (F-FDTL) halo tan rekrutamentu ba membru foun hamutuk na’in 87 ho grau akademiku lisensiatura no mos mestradu.
Kordenador Primeiru Komisaun Rekrutamentu F-FDTL tinan 2023, Nuno Carvalho dos Santos, hatete, rekrutamentu ba membru foun F-FDTL refere hahu dia 5 to'o diak 20 fulan outubro tinan 2023 no rekrutamentu ida ne'e via online.
Nia dehan rekrutamentu ne'e bazeia ba despaisu Ministru Defeza no Komandu F-FDTL ne'ebe sai iha loron 2 outobru 2023 hodi orienta komisaun rekrutamentu atu loke ba publiku konaba prosesu rekrutamentu ba membru F-FDTL ho grau akademiku lisensiatura, no mestradu hamutuk na’in 87 iha tinan nee.
"Ohin Governu liu husi Ministeriu Defesa no Komandu F-FDTL halo tan rekrutamentu ba membru foun no vaga ne'e prioridade ba nivel edukasaun lisensiatura no mestradu ne'ebe iha intrese bele tama iha fileira forsa armadas," Kordenador Rekrutamentu Santos dehan liu husi Conferensia Imprensa iha Fatuhada.
Nia dehan, rekrutamentu ba membru F-FDTL foun ne'e aplicante sira sei aplika liu husi sistema aplikasun online.
“Ita halo prosesu rekrutamentu ho sistema online ne'e atu evita ema hatama malu husu kotuk," nia informa.
Nia esplika prosesu rekrutamentu ne'e, kada aplikante sira sei iha rasik numeru identifikasaun atu fasilita sira rasik bele akompanha rekrutamentu hahu husi faze selesaun dokumentu to'o liu kalae iha vaga ida ne'e nia bele hatene.
"Sistema online nee rasik rejistu ho aplikante ne'e nia naran, no nia mak sei simu numeru identifikasaun, tanba ne'e nian rasik mak sei akompanha prosesu ne'e to'o remata," nia dehan.
Enkuantu nia dehan, konaba kriteiru sira komisaun taka iha sede suku Becora, Comoro no suku sira iha Díli laran, kriteiru ba rekrutamentu mak aplikante sira tenke aprezenta dokumentu komprovativu ba komisaun rekrutamentu sertifikadu nivel akademiku, krikulum vitae no anexa ho dokumentu sira seluk hanesan kartaun eleitoral, billete identidade no kartaun sira seluk.
Iha parte seluk, Diretor Ezekutivu Fundasaun Mahein (FM), Nelson Belo dehan rekrutamentu ne'ebe dadaun realiza ne'e ba deit ofisial tanba liga ba nia kriteria ne'ebe mak iha ne'e prioridade ba ofisiais laos soldadu.
"Tanba ne'e enkoraza ba foinsa'e sira ne'ebe mak iha nivel edukasaun lisensiatura no mestradu karik iha interese bele compete, ba feto no mane," nia dehan.
Enakuntu nia dehan, husu ba governu tenke kria mos kondisaun ba membru rekrutamentu sira hodi garante katak bainhira sira tama ona asrama sei la halai sai tan hanesan akontese iha tinan kotuk ne'e.