- Publika iha: 13 Outubro 2023
Komandu Polísia Nasional Timor-Leste (PNTL) husu governu liuhusi Ministériu Interior (MI) atu orienta kompañia ne’ebé konstrui edifisiu Esquadra Dom Aleixo tenke aselera lalais, tanba fulan remata kontratu liu ona.
Komandante Jerál PNTL, Komisáriu Henrique da Costa, dehan kontratu ba kontrusaun edifisiu Esquadra Dom Aleixo ne'e nia durasaun durante tinan ida hahú husi tinan kotuk no tenke finaliza iha fulan setembru ne'e maibé to'o agora seidauk finaliza.
"Husu ba governu atu bele toma responsabilidade ho orienta kompañia ne’ebé kaer konstrusaun atu bele aselera lalais, nune'e Polísia Esquadra Dom Aleixo bele utiliza hodi halo servisu,tanba durante ne'e sira utiliza de’it espesu kiik oan ida iha sentru Formasaun Polísia ne'e hodi halo servisu," nia dehan iha CFP.
Tanba ne'e, nia haktuir, espera katak governu bele rona no fó orientasaun ba kompañia atu nune'e bele aselera lalais konstrusaun nune'e membru sira bele hela iha fatin ne’ebé dignu hodi halo servisu hodi servi povu no nasaun.
"Edifisiu ne'e ami hanesan na’in, ami hein simu de’it, kona-ba prosesu konstrusaun governu mak responsabilidade ho kompañia," Komisáriu Costa dehan.
Entretantu, Ministru MI, Fransisco Guterres, hatete prosesu konstrusaun ba edifisiu Esquadra Dom Aleixo ne'e dadaun ne'e atinge ona 85 porsentu, no nia prosesu konstrusaun kleur ituan ne'e, tanba material konstrusaun balun ne'e presiza hatama husi rai-liur ne'e tenke han tempu.
"Maibé ita fiar katak iha tinan ida-ne'e ita bele entrega ona edifisiu foun Esquadra Dom Aleixo ne'e ba Komandu PNTL no sei utiliza husi Polísia Esquadra Dom Aleixo," nia dehan.
Tanba ne'e husu ba Komandu PNTL atu aguenta tan lai hodi hein konstrusaun hotu no governu sei entrega hodi utiliza ba servisu.
Enkuantu Kontrusaun Esquadra Polísia Dom Aleixo hahú iha loron 17 fulan Outubru tinan 2022 no projetu ne'e uza Orsamentu Estadu hamutuk $1,551,974.61.