- Publika iha: 14 Outubro 2023
Governu liuhusi Ministériu Interior (MI) husu Komandu Polísia Nasional Timor-Leste (PNTL) tenke aplika pena ba membru sira ne’ebé utiliza sala arma hodi tiru komunidade.
Ministro MI, Francisco Guterres dehan, kona-ba utilizasaun arma ne'e kontroladu nune'e mos armajen rai arma ba membru polísia sira-ne'e mós iha bainhira fora husi oras servisu tenke intrega arma labele lori ba uma, bainhira uza fora servisu tenke iha autorizasaun ba servisu operasaun sira.
Nia dehan, liga ba kazu ne’ebé foin akontese tui-tuir malu katak membru polísia utiliza arma hodi tiru komunidade ne'e, bainhira indetifika sala tenke aplika pena.
"Liga ba kazu hirak ne’ebé akontese ne'e bainhira identifika sala Komandu PNTL tenke aplika pena rigorozu liuhusi medida disiplinar nune'e mós pena prizaun," MI Guterres dehan.
Tanba ne'e nia dehan, husi membru 4,000 ne'e iha membru ida rua sei sala, tanba ne'e tenke aplika pena ne’ebé rigorozu labele halimar tenke simu sansaun tuir sala ne’ebé mak nia halo.
"Dadaun ne'e hau husik ba komandu atu bele halo investigasaun ho di’ak, nune'e bele aplika sansaun hodi responde ba sala ne’ebé sira komentáriu, nune'e mós sai hanesan ezemplu ba sira seluk, katak sira seluk mak halo fali mós sei aplika pena hanesan," nia informa.
Entretantu Portavós PNTL, Superientendente Antonio da Luz dehan, membru na’in rua ne'e utiliza arma tiru maluk joven na’in 2 iha semana kotuk ne'e dadaun ne'e hapara ona sira husi servisu no asegura hela iha sela detensaun Komandu Jeral PNTL nain.
"Ita asegura ona iha sela detensaun hodi halo prosesu investigasaun nian liuhusi rezultadu investigasaun mak hatudu nia indisiu ne'e no komandu sei hola desizaun hodi aplika sansaun disiplinar no hasai husi instituisaun PNTL no submete ba prosesu iha tribunal," nia dehan.
Enkuantu membru na’in rua ne'e ho inisial DJ no AR mak komete iha kazu utiliza arma tiru joven iha dia 16 setembru no Bidaun ida akontese iha dia 21 setembru iha Lautem.