- Publika iha: 17 Outubro 2023
Unidade Polísia Marítima (UPM) dadaun ne'e koloka ona membru ekipa rua hodi kontrolu atividade peska ilegál iha munisipiu Tutuala.
Komandante UPM, Superientendente Eugénio Pereira, dehan liga ho akontesimentu peska ilegál ne’ebé mak durante ne'e, akontese iha Tutuala ne'e no komandu orienta ona UPM hodi koloka membru hodi halo prevensaun ba atividade peska ilegál.
"Dadaun ne'e ita koloka ona membru ekipa 2, nune'e mós kompleta ho ekipamentu nune'e mós ró ida atu sira bele utiliza hodi kontrolu peska ilegál iha tasi Tutuala," nia dehan.
Nia dehan, membru ekipa 2 dadaun ne'e halo hela atividade kontrolu no prevensaun ba ró ilegál sira ne’ebé atu tama tasi Timor hodi halo atividade peska ilegál hodi foti riku soin Timor-Leste nian iha tasi.
"Ami mantein nafatin servisu vizilansia ho servisu ne’ebé planea ona kona-ba privasidade ne’ebé hatudu ba peska ilegais nian," Komandate UPM Superientendente Pereira dehan.
Tanba ne'e nia dehan, maské ho rekursu no ekipamentu ne’ebé natoon UPM nafatin halo vizilánsia tuir téknika no meiu ne’ebé sira prepara ona.
Entretantu, Diretór Ezekutivu Fundasaun Mahein (FM), Nelson Belo, dehan tuir monitorizasaun ne’ebé mak iha durante ne'e hare katak esforsu UPM ne'e hodi asegura tasi ne'e diak tebes maske ho ekipamentu ne’ebé mak naton.
"Ita hare katak servisu UPM nian durante ne'e iha progresu di’ak tebes, tanba konsegue halo ona aprensaun ba atividade ilegál, peska ilegál no salva komunidade balun ne’ebé hetan dezastre iha tasi," nia dehan.
Tanba ne'e haree ba rezultadu servisu ne’ebé UPM halo durante husu atu governu bele investe liu-liu kompleta ekipamentu ró ba UPM hodi apoiu servisu kontrolu tasi.