Medikus Publiku Halo Pratika Iha Klinika Privado

Bazeia ba dekretu lei no 13/2012 governu implementa ona regime especial ba iha profesionais saude sira hanesan meus ida atu motiva profesionais saude sira hodi fo atendimentu saude ne’ebe kualidade ba iha populasaun maibe profesionais saude barak halao pratika iha klinika privado hodi hetan osan mos.

Ministru Saude, Sergio da Costa Lobo, hateten lolos ida ne’e labele tanba governu responde ona ba iha profesionais sira nia ejijensia hodi implementa kareira profesionais. 

Nia haktuir, ministerio iha ona koordenasaun ho telekomunikasaun sira iha tempu badak sei implementa sistema Information Comunication Teknologi (ICT) iha fasilidade saude hotu hodi kontrola servisu profesionais saude sira iha teritorio tomak. 

Ministru Lobo mos rekonese iha duni keixa barak husi familia pasiente komunidade sira kona ba profesionais saude sira abandona servisu, tanba ne’e presiza teknologia sira atu bele detekta.

“Tanba ne’e presiza duni monta teknologia sira ne’e atu bele kontrola tanba dala barak ita la hatene sira tama servisu ka lae,” Ministru Lobo hateten, hafoin partisipa wokshop konsultativu ba dezenvolvimentu strategia saude nasional atu hadia rezultado saude iha Timor –Leste, iha Hotel Novo Turismu, Dili. 

Nia hatutan bainhira sistema monta ona iha medikus no ajente saude balun mak abandona servisu sei hetan sansaun tuir regulamentu funsaun publika nian hanesan funsionario publiku. 

Entretantu, Diretor Jeral Ospital Nasional Guido Valadares (HNGV), Jose Antonio Gusmão hateten regulamentu ospital bandu medikus sira labele halo pratika iha klinika privado sira  maibe seidauk bele hapara bainhira sira halao pratika laos oras servisu nian hanesan funsionario publiku. 

“Importante sira tenke kumpri sira nia oras servisu tuku 8:00 dader to’o 5:00 lokraik, liu ida ne’e sira bele ba halo aktividade seluk hanesan faan sasan ruma ne’e sira nia urusaun,”doutor Gusmão hateten. 

Nia hatutan, iha medikus barak mak agora dadaun halo pratika iha klinika privado sira seidauk bele bandu ida ne’e, tanba sira halao pratika (servisu) bainhira oras servisu iha ospital remata ona liu tuku 6:00 sira bele halo aktividade seluk. 

Iha parte, Membru Parlamentu Nasional, Deputado Eladio Faculto konsidera falta kontrolu husi Ministerio Saude tanba lolos sira labele halo pratika iha klinika privado sira tanba sira hetan ona regime kareira. 

“Hau hanoin ida ne’e falta kontrolu husi Ministerio Saude,” Deputado Faculto hateten.