- Publika iha: 15 Janeiro 2015
Tuir rezultado peskiza ne’ebe organizasaun internasional Mari’e Stopes Internasional Timor –Leste (MSITL) halo iha distritu Dili no Viqueque, hatudu katak sistema barlaque limite inan feto sira asesu ba programa Planeamentu Familiar.
Koordenador Komunikasaun MSITL, Eurico da Costa, hateten iha inan feto balun mak iha ona konesementu klean kona ba importansia Planeamentu Familiar (PF) no asesu ona ba programa ne’e, maibe iha barak mos seidauk tanba kultura.
“Barlaque duni sai impaktu ba feto sira atu asesu ba planeamentu familiar, la’en sira la fo lisensa ba inan feto sira atu fo espasu ba oan,” Koordenador da Costa hateten, iha Dili.
Tanba ne’e, nia dehan, MSITL sei servisu maka’as atu halo sosializasaun no edukasaun ba autoridade, lia nain no komunidade liu –liu la’en sira kona ba importansia husi PFr atu bele fo lisensa ba fen sira.
Nia hatutan, liu iha area urbana inan feto barak mak asesu ona ba iha atendimentu planeamentu familiar maibe iha area rural barak mak seidauk tanba laiha hetan informasaun ne’ebe klean no supporta husi laen sira.
Iha parte seluk, Doutora Domingas Bernardo hateten, planeamentu familiar importante tebes atu inan feto sira bele rekopera sira nia saude, hare familia liu –liu oan sira atu labele hetan malnutrisaun.
Nia hatutan, bainhira la fo espasu ne’ebe diak ba oan primeiru no segundu perigu ba saude inan nian bele mate baihira partus tanba iha implikasaun oioin ne’ebe prezudika hanesan ran facar, anemia no seluk tan.
“Planeamentu familiar ne’e importante tebes laos atu limita numeru oan maibe fo espasu atu inan feto sira bele deskansa no rekopera sira nia saude,”dehan Doutora Domingas.
Nia hatutan kampania edukasaun planemanetu familiar importante tebes atu ema hotu bele iha kuinesementu ne’ebe klean kona ba importansia husi planeamentu familia ba sira nia familia.
Iha parte seluk, Master Training MSITL, Fernanda Maria Serra hateten espasu ne’ebe diak ba inan feto sira mak tinan tolu to’o tinan lima atu inan feto sira bele rekopera sira nia saude hafoin partus.
“Espasu ba oan ne’ebe diak ne’e tinan tolu to’o tinan lima atu bele hare oan sira ne’ebe ki’ik no fo tempu ba inan atu deskansa liu –liu oan fatin tanba bainhira partus oan fatin kanek,” dehan Nia.
Nia hatutan, la fo espasu ne’ebe diak inan sira bele hetan infeksaun iha oan fatin, tanba oan fatin seidauk pronto atu produs fila fali.