- Publika iha: 26 Agosto 2011
Adjuntu Unidade Polisia Tranzitu, Inspektur Valente Soares hateten Poliisia sei halo cek poin ba transporte publiku liu-liu mikrolet sira ne’ebe halo operasaun iha Dili maibe la tuir jalur ka hatun pasajeirus sira iha dalan klaran, sei selu multa $10,00.
“Ami servisu hamutuk ho Diresaun Nasional Transporte e Terestres (DNTT) atu halo cek point ba kareta sira ne’ebe halai arbiru tuir sira nia hakarak,”informa Inspektur Valente Soares, semana kotuk iha Kaikoli,Dili.
Nia parte hato’o kestaun ne’e relasiona ho mikrolet balun halai la tuir jalur, hanesan mikrolet 03, 010 no mos 07 ne’ebe dalabarak hatun pasajeirus iha dalan klaran.
Kona-ba mikrolet sira ne’ebe halai la tuir jalur, nia parte bolu atensaun ba kondutor sira inklui ho patraun sira atu tau atensaun ba kestaun ne’e.
“Se la’e ami hapara hotu sira nia kareta no hatama fali ema seluk nia kareta ne’ebe hakarak halai tuir jalur, kumpri regulamentu ne’ebe iha e ita boot sira ni kareta sai hotu kareta privadu, ne’e perigu,” nia dehan.
Nia hatutan, polisia tranzitu sei fo nota autodiversaun (tilang), depois ba selu multa iha DNTT, hafoin ne’e halo xamada atensaun ba kareta nain, karik halo tan mak sei selu multa $10,00 to’o 30,00 dolares Amerikanu.
Iha parte seluk kondutor mikrolet 03 ne’ebe la kohi fo sai nia identidade, hateten sira halai latuir route ne’ebe iha tanba ho razaun kondisaun estrada ladiak.
“Se nune’e Ministrio Infra estrutura hadia tiha estrada husi area Branca nian no to’o iha Hospital Guido Valadares nian lalais atu nune’e ami bele liu husi ne’eba, se la’e ami halai tuir jalur 010 nian,”nia husu. ν
