- Publika iha: 27 Agosto 2011
Tuir Prezidente Komisaun Nasional ba Eleisaun (CNE) Faustino Cardoso hateten edukasaun sivika ne’ebe hala’o ba sidadaun sira, oras ne’e tama ona 88% hala’o iha sub-distritu iha Timor laran tomak.
“Falta oituan deit mak seidauk tama e iha tempu badak nia laran bele kompleta hotu ona,”hateten Prezidente CNE, Faustino Cardoso, semana kotuk iha nia knar fatin Balide,Dili.
Tuir nia, iha tempu badak nia laran sira sei desloka distritu Oe-Cusse hodi hala’o edukasaun sivika ba komunidade sira iha sub-distritu Pasabe.
“Iha edukasaun sivika ne’e ami mos konvida partidus politikus sira, profesores sira, autoridade lokais sira e sira ne’e mak sai partisipante iha atividade ne’e,”nia dehan.
Dosente Fakuldade Sosial Politika iha UNTL ne’e espera katak partisipante sira ne’e bele haklaken liu informasaun ba iha baze,liu-liu ba komunidade sira iha aldeia inklui mos ba militantes no simpatizantes tuir estrutura partidu ida-idak nian.
Alende ne’e, tuir komunidade Mascarenhas, Bonifacio da Costa, katak edukasaun sivika ne’e importante nune’e sir abele iha konesementu kona-ba oinsa mak preoara aan ba iha eleisaun jeral iha 2012.
“Edukasaun civika CNE halo ne’e importante liu ba ami komunidade sira tanba fahe informasaun nebe diak mai ami komunidade oinsa para bele hatene kona-ba prosesu eleisaun 2012 nian,”Bonifacio dehan.
Tuir nia,liu husi edukasaun sivika ne’e bele desimina informasaun diak liutan ba komunidade sira liu-liu sira ne’ebe iha are rurais sukus no aldeias sira.
“Liu husi edukasaun sivika ne’e ami komunidade sira bele fo informasaun ne’ebe los ba ami nia kolega no ami nia familia sira,” nia informa.
