- Publika iha: 30 Agosto 2011
Tuir planu kompania Timor Telecom (TT) sei hari Sentru Komunitaria Internet (SKI) iha Timor laran tomak hodi fasilita juventude no komunidade liu-liu sira ne’ebé iha area rurais atu asesu ba Internet.
“Ami iha projetu ida atu harii tan Sentru Komunitaria Internet 100 iha teritoriu tomak, nune’e ita nia joven sir abele asesu ba internet liu-liu sira ne’ebé iha area remotas,”informa Diretór Relasaun Institusinais TT, Manuel Carceres, semana kotuk hafoin asina akordu parseria ho Sekretariu Estadu Formasaun Profesional e Empregu (SEFOPE),Balide,Dili.
Tuir nia, nia parte asina ona Memorandu d Intendementu ho SEFOPE atu fasilita internet ba jovens sira iha Timor laran tomak.
“Tanba ne’e mak ami parseria ho igreja ho SEFOPE para atu hare tok potensia joven sira no emprezarius sira para ita bele dinamiza dezempregu ho sub-dezempregu iha Timor-leste,” Manuel katak.
Entretantu tuir estudante Universidade Nasionál Timor-Lorosa’e (UNTL), Crizogno Martins apoia inisiativa ida ne’e nune’e bele fasilita komunidade liu-liu estudante sira.
“Ha’u hanoin ideas ne’e kapaás no importante atu nune’e ita nia joven sira liu-liu estudante sira iha area rurais bele asesu ba internet,”nia dehan.
Tuir nia,agora tama era globalizasaun presiza duni internet nune’e ema hotu bele asesu ba informasaun tantu informasaun iha rai laran no liur.
“ita hotu hatene katak oras ne’e dadauk ema barak seidauk hatene konaba internet tanba ne’e mak inisiativa Timor Telecom ne’e diak nune’e ema hotu bele hatene diak liu tan,”nia katak.
Iha parte seluk Domingos Leonardo Guteres estudante UNTL husi Fakuldade Engenaria, Departementu Elektro Tekniku hateten ne’e inisiativa diak ida husi TT nune’e ema hotu bele asesu ba informasaun liu husi internet.
Nia dehan, internet hanesan biblioteka ida ne’ebé ema hotu liu-liu ba estudante sir abele hetan informasaun iha internet ne’e.
“Maibé karik loke duni, ami husu para hatun presu nune’e ema bele asesu, se presu aas liu,saugate de’it e ema se la asesu,”nia espera.
