- Publika iha: 10 Março 2016
Sekretario Ezekutivu Fundu Dezenvolvimentu Capital Humanu, Ismenio Martins da Silva, hateten Timor –Leste sei menus rekursu humanu iha area sensia ezata, tanba ne’e tinan ne’e sei haforsa.
Nia dehan, area espesializada sira ne’ebe presiza haforsa mak hanesan mediku espesialista, engenaria ba ekipamentus medikus, tekniku analiza kualidade rai ba konstrusaun no agrikultura, tekniku metrologia geofisika, arkeologia no tekniku transformasaun produtu, engineiru peskas no IT forensic nian tanba Timor oan sei menus iha area hirak ne’e.
“Ita presiza aumenta tan rekursu humanus iha area sira ne’e,” Sekretario Martins, hateten, iha nia fatin, Fatu-Hada, Dili.
Nia hatutan, tinan 2016 sei fo prioridade ba area espesializada sira ne’e, tanba durante ne’e laiha rekursus atu hadia ekipamentus iha hospital bainhira aat inklui espesialidade seluk.
Nia informa, tinan ida ne’e parlamentu aprova $34 miloens ba dezenvolvimentu capital humanu ne’ebe kapasitasaun sei hala’o iha rai laran no rai liur.
Nia hatutan, hahu tinan 2011-2015, investe ona $184 miloens ba kapasitasaun rekursu humanus.
Tuir dadus total bolseirus ne’ebe asesu ba FDCH hamutuk nain 3.195 hala’o estudu iha rai liu no rai laran, husi numeru ne’ebe iha nain 595 gradua ona iha area oi-oin, barak mak integra ona iha instituisaun governu, tanba barak mak funsionario publiku.
Entretantu prezidente komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, estudu ba nesesidade ne’e importante tebes atu bolseiru sira ne’e fila mai servi duni povu.
“Tenke define rekursu humanu ne’ebe ita presiza hodi bele orienta politika bolsa ne’ebe bazeia ba nesesidade nasaun nian,” Deputadu Hornai hateten.
Nia hateten, fundus ida ne’e ba mos kapasitasaun ba makina governu nian, tanba ne’e ministerio sira tenke identifika area prioridades ne’ebe presiza liu atu kapasita no haforsa.
