- Publika iha: 19 Setembro 2014
Falintil Forsa Defeza Timor-Leste (F-FDTL) ho Forsa Parseria pasifika 2014, estabelese klinika emergensia ba komunidade iha suku Comoro.
Forsa Parseria Pasifika 2014 ne’e kompostu husi forsa husi Estadu Unidus da Amerika (EUA), Nova Zelandia, Australia no Timor-Leste rasik.
Xeve Estadu Forsa Armada, Brigadeiru Jeneral Filomeno Paixao, hateten klinika komunitaria ne’e estabelese hodi fasilita komunidade sira ne’ebe moras ho tipu emergensia.
“Ami F-FDTL kontribui rekursu humanu deit, enkuantu materiais ne’e Forsa Parseria mak hola,” Brigadeiru Paixao hateten, iha Comoro, Dili.
Nia dehan, klinika emergensia ne’e estabelese bazea ba rekomendasaun husi Ministeriu Saude nian.“Embaixada Amerika ba koalia ho Vise Ministra Saude, depois sira dehan mai ami no ami servisu deit,” Brigadeiru Paixao hateten.
Enkuantu Komandante Forsa Parseria Pasifiku 2014, Comoodore Rodney Moore, espera katak klinika ida ne’e bele ajuda komunidade suku Comoro ho total populasaun 100.000.
Nia hatutan, ho konstrusaun klinika emergensia ne’e, forsa sira mos bele besik liu ba komunidade no engineria husi F-FDTL no Forsa Parseira pasifika troka esperiensia ba malu.
“Ne’e diak los hodi harii amizade,” Komandante Moore hateten.
Tanba ne’e nia husu ba komunidade no forsa F-FDTL atu kaer metin nafatin amizade ida ne’e hodi alkanza ba oin.
Iha fatin hanesan Vise Ministra Saude, Natalia Araujo, apresia ho suporta ne’ebe husi parte F-FDTL no forsa parseria Pasifika fo ba komunidade.
“Ne’e tulun bo’ot ida ne’ebe ita hein hela, e agora iha ona entaun oinsa mak ita atu uja fasilidade ida ne’e hodi fo asistensia ba ita nia komunidade liu-liu iha kazu emergensia sira,” Vise Araujo hateten.
Iha tempu badak, nia dehan,Ministeriu Saude sei tau fasilidade no pessoal saude iha klinika ne’e, hodi halo tratamentu 24 oras ba pasientes.
Ho nune’e, nia hatutan, bele hamenus pasiente ne’ebe mak durante ne’e ba konsentra hotu iha sala emergensia Ospital Nasional Guido Valadares (HNGV), Tanba dalabarak moras bai-bain mos ba hotu iha ospital nasional.