- Publika iha: 11 Novembro 2014
Polisia Servisu Investigasaun Kriminal (SIK) to’o agora sei nafatin menus kona ba transportes, e situasaun ida ne’e impede sira atu hala’o servisu iha baze ho diak.
Komandante Ezersicio, Inspector Xefe Manuel Alves, hateten total kareta ne’ebe agora iha hamutuk sia, motor hamutuk sia, enkuantu kareta rua avaria tiha ona.
“Dala ruma ita hein malu,” Komandante Alves hateten, iha Kaikoli, Dili.
Maske ho kondisaun ne’ebe limitadu, maibe nia dehan, SIK nia servisu nafatin la’o, mesmu ho prosesu ne’ebe tarde.
Nia dehan, kestaun ne’e sira nia parte hato’o ona ba governu, maibe to’o agora laiha resposta ne’ebe positive.
Iha parte seluk Membru Komisaun B (defeza, seguransa no negosiu estranjeirus), Deputadu Cesar Valente, hateten iha tinan hirak liu ba Polisia Nasional Timor-Leste (PNTL) mos hetan kareta doasaun husi UN.
“Maibe sira kestiona, tanba kareta sira ne’e barak mak a’at,” Deputadu Valente hateten.
Tanba ne’e nia sujere ba governu liu husi Sekretariadu Estadu Seguransa (SES), tenke iha lista ne’ebe fiksu kona ba kareta ne’ebe funsiona no kareta ne’ebe at, nune’e wainhira aprazentasaun Orsamentu Jeral Estadu (OJE) bele tau hanesan kestaun.
“Ami presiza dadus,” nia dehan.
Iha parte seluk Estudante Fakuldade Direitu husi Universidade Nasional Timor Lorosa’e (UNTL) Vasco Pereirra, hateten estadu tenke tau importansia ba area seguransa, tanba parte ida ne’e importante los.
“Polisia asegura seguransa iha rai laran, no Forsa Defeza asegura amiasa husi rai liur, ne’ebe presiza tau fasilidade ne’ebe kompleto inklui rekursu humanus ne’ebe sufsiente,” nia hateten.
