- Publika iha: 17 Outubro 2016
Atendementu Polisia Tranzito Nasional (POLTRANS) durante ne’e ladun masimu iha terenu tanba falta transporte, tanba ne’e Membru Parlamentu (MP), Manuel Castro sujere ba governu atu sosa tan kareta ba unidade ida ne’e.
Tanba tuir nia, kareta ne’ebe deslokadu iha polisia tranzito ne’e ida deit, enkuantu kazu asidente trafiku kada loron aumenta.
“Kareta ida deit, halo nusa mak sira bele ba fatin hotu ne’ebe akontese asidente trafiko, sira ba tiha Colmera atende kazu ida iha ne’eba no iha momentu hanesan akontese mos iha Comoro, oinsa mak sira bele atende ida ne’e,” MP Castro kestiona, iha Parlamentu Nasional.
Nia hateten, POLTRANS kaer knar ne’ebe importante, governu tenke fasilita transporte inklui ekipamentus ne’ebe sufsiente, hodi bele garantia sira nia profesionalidade servisu iha baze.
Tanba, nia dehan komunidade presiza atendementu ne’ebe lais no efikas e governu iha responsabilidade oinsa mak bele kria fasilidade no hadia sistema atendementu.
Hatan ba kestaun ne’e Ministru Interior (MI) Longuinhos Monteiro, hateten governu iha hanoin diak atu hadia kondisaun hirak ne’e, maibe depende ba orsamentu ne’ebe iha.
“Bazea ba orsamentu ne’ebe iha e iha tinan ida ne’e hamosu politika halo poupansa, entaun ita la’o tuir deit saida mak iha ona,” Ministru Monteiro hateten.
Nia dehan, karik governu ida ne’e la konsege hadia sira nia kondisaun, governu foun mai sei hadia kestaun hirak ne’e.
“Governu foun mai sei hadia ida ne’e,” nia hateten.
Iha parte seluk komunidade Manuel Guterres, rekonese katak atendementu polisia liu-liu ba kazu asidente iha baze tarde duni.
“Dala ruma sira to’o mai ema ida soke ne’e halai tiha,” nia dehan.