- Publika iha: 08 Agosto 2014
Membru Parlamentu Nasional kestiona maka’as ezekusaun Orsamentu Jeral Estadu (OJE) 2014 iha Ministeriu Administrasaun Estatal (MAE) ne’ebe barak liu ba viajen estranjeirus duke viajen ba distritus.
Membru Komisaun D (ekonomia no dezenvolvementu), Deputada Josefa Alvares Pereira Soares, hateten presiza bolu atensaun, tanba ministerio ida ne’e nia relasaun importante tebes ba iha prosesu dezenvolvementu sira iha nivel baze.
“Ami haree iha portal transparensia, to’o dia 12 Junu, hatudu katak ezekusaun orsamentu iha Ministeriu Administrasaun Estatal iha primeiru trimester ne’e 100% mak viajen estranjeirus, enkuantu viajen lokal foin atinji 25.9%,” Deputada Soares kestiona, iha Parlamentu Nasional.
Nia haktuir, viajen estranjeirus bele halo bainhira fo duni kontribuiasaun ba dezenvolvementu iha rai laran,la’os ba bar-barak maibe fila laiha rezultadu.
“Sira ladun importansia ba ezekusaun viajen local, it abele ba estranjeirus kuandu iha prioridades,” nia hateten.
Preokupasaun hanesan mai mos husi Deputadu Manuel Castro, katak foin trimester primeiru deit gastu barak ona ba viajen estranjeirus, pior liu tan trimester tuir mai.
“Foin fulan tolu ita bo’ot sira gasta 100% ona ba iha viajen estranjeirus, trimester tuir mai ne’e gasta tan hira,” Deputadu Castro preokupa.
Hatan ba kestaun ne’e, Ministru Administrasaun Estatal, Jorge da Conçeicão Teme, katak viajen estranjeirus ne’e nesesidade duni, no presiza gasta barak.
“Hau autoriza viajen ne’ebe fo duni kontribuisaun ba dezenvolvementu ita nia rai no responde duni ba ita nia nesesidade e hau la autoriza ema ne’ebe ba pasiar iha liur,” Ministru Teme hateten.
Nia haktuir, Orsamentu Jeral Estadu 2014 ba Ministeriu Administrasaun Estatal ho total $37,479 no konsege ezekuta ona 53% iha primieru trimester.
Nia hatutan, alokasaun orsamentu sira ne’e barak liu ba iha bens de servisu, vensimentu no capital dezenvolvementu nian, liu –liu iha programa Nasional Dezenvolvimentu Sukus (PNDS).
“Tinan ida ne’e propgrama PNDS sei kobre sukus 442 iha teritorio tomak,” Ministru Teme hateten.
