- Publika iha: 11 Novembro 2015
Membru Parlamentu Nasional, Deputado Francisco da Costa, hateten fiskalizasaun ne’ebe deputado sira halo iha munisipios kada semana gasta osan povu nian deit, tanba governu la konsidera rezultado fiskalizasaun ne’ebe iha.
Membru Komisaun A (konstitusaun, justisa, administrasaun publika, poder local e anti –korupsaun) ne’e, hateten governu la konsidera rezultado fiskalizasaun, tanba kestaun ne’ebe membru parlamentu sira foti governu la hadia.
“Hau hanoin ita lalika halo fiskalizasaun tan ona, tanba iha ita koalia ema la rona, sa tan iha foho, ne’ebe lalika gasta povu nia osan tan,” Deputado Costa hateten, iha Parlamentu Nasional.
Nia hatutan, realidade iha Dili laran negosiante parte Becora fa’an iha ponte no trotoar leten difikulta movimentu transporte kada semana membru Parlamentu Nasional sira kestiona, maibe governu nunka atu resolve.
“Ezemplu iha Becora, negosiante ambulante sira fa’an to’o iha ponte leten difikulta movimentu transporte ba mai, deputado sira hotu foti kestaun ne’e hahu husi tinan 2005 to’o agora laiha ida mak konsidera,” nia hateten.
Entretantu Sekretario Estado asuntu Parlamentar, Maria Teresinha Viegas, agradese ba xamada atensaun husi membru parlamentu sira ba governu hodi hadia situasaun moris povu nian.
Nia dehan, fiskalizasaun ne’e knar importante ida husi orgaun legislative nian, fo hanoin governu bele hadia no la’o tuir hodi hadia kondisaun moris populasaun sira nian.
“La’os fiskalizasaun mak laiha folin, maibe governu mak la konsidera,” nia hateten.
Kona ba problema merkadu, nia dehan, governu esforsu ona atu orienta no hadia tuir estandarte ne’ebe iha, maibe negosiante sira mak laiha konsensia atu kontribui ba prosesu sira ne’e.
